Ҳафта давомида Америка Эронга зарбаларни давом эттирди. Июнда имзоланган англашув меморандуми энди кераксиз қоғозга айланди, уруш қандай тугашини ҳеч ким билмайди. Украинада шов-шувли истеъфодан кейин одамлар Зеленский қарорига қарши намойишга чиқди. ЖЧда бугун ғолиб аниқланади. 39 ёшида гладиаторга айланган Месси Аргентинани учинчи марта мундиал финалига олиб чиқди. Қуйида ҳафтанинг шу ва бошқа муҳим воқеаларини ёдга оламиз.
Уруш давом этади
Ҳафта давомида АҚШ Эронни бомбалашни давом эттирди. Трамп айтарли сабабсиз урушни қайталаб юборди. Эсингизда бўлса, томонлар 17 июн куни 60 кунлик ўт очишни тўхтатиш бўйича келишиб олган, ҳар икки давлат президенти англашув меморандуми имзолаганди. Ўшанда бу жуда мўрт келишув бўлганини айтгандик. Кўриб турибсиз, ҳеч қандай сулҳ бўлмади, уруш тугамади, Америка Эронга янада жиддий зарба беришни ўйламоқда. Бу гал энергия объектлари, кўприклар ва бошқа инфратузилма манзилгоҳлари нишонга олиниши мумкин.
Америка нашрларига кўра, Вашингтон Исроилга қўшимча 30 та ёнилғи самолётлари юборган, ҳали яна юбораркан. Ҳавода қирувчи самолётларга ёнилғи қуювчи бунақа учоқлар Исроил ва Америка катта операция бошлаётганини билдиради. Қирувчилар авжига чиқиб ракета отаётганда ерга қўниб ўтирмасин деб мана шунақа учоқлар ўйлаб топилган.
Эрон ҳам қўлида бор қуролларни Американинг Яқин Шарқдаги базаларига отяпти. Бу орада уруш қайталаниши ҳақида минг хил версия ўртага чиқди. Хусусан, Трамп Исроил босими билан урушни қайталади. деган гап кўп тилга олинмоқда. Хуллас, бу уруш ҳали бери тугайдиганга ўхшамайди. Исроил келишув меморандуми имзолангач, жуда норози бўлганди. Улар Эронни буткул йўқ қилмагунча тинчимоқчи эмас. Бу эса имконсиз нарса, Эрон бошидан охиригача 40 км келадиган Ғазо эмас ахир.
Сенаторнинг ўлими
Америкалик сенатор Линдси Гремнинг ўлими катта воқеа бўлди. Трампнинг энг яқин маслаҳатчиларидан бири бўлган Грем Эронда уруш бошланишининг асосий ташаббускорларидан эди. Шунингдек, Украинага нисбатан танқидий қарашда бўлган Трампдек президент даврида Грем Киевни ашаддий қўлловчи сиёсатчи эди. Ўлимидан бир кун аввал сенатор Киевда Зеленский билан учрашган. Шу сабаб унинг ўлими ҳақида турли шубҳа-гумонлар кўпайди.
Россия ва Эрондан «сенаторни Исроил ўлдириб, Трампга сигнал юборди» деган версия тарқалди. Кўпчилик бу одам 71 ёшда бўлгани учун ўз ўлими билан вафот этиши табиий ҳол деб ўйлаётгани йўқ. Чунки бунақа катта одам кутилмаганда ўлиши барибир гап-сўзни кўпайтиради.
