АҚШ ва Эрон ўртасидаги вақтинча сулҳ бузилганидан буён қаторасига саккизинчи кун томонлар ўртасида зарбалар алмашинуви давом этди.
АҚШ Марказий қўмондонлиги (Centcom) маълум қилишича, навбатдаги авиазарбалар президент Доналд Трампнинг топшириғи бўйича Шарқий соҳил вақти билан шанба куни 18:00 да (Гринвич бўйича 22:00) бошланган.
«Зарбалар Эроннинг Ҳўрмуз бўғозидаги тижорат кемачилигига таҳдид солиш қобилиятини янада заифлаштиришга ва ўтган тунда Иорданияда америкалик ҳарбийларга ҳужум қилган Ислом инқилоби қўриқчилари корпусини жазолашга қаратилган», – дейилади шанба кунги баёнотда.
Қарийб олти соат ўтиб, қўмондонлик яна шундай баёнот берди:
«АҚШ ҳужумларининг кетма-кет саккизинчи кечаси давомида Centcom кучлари Эроннинг соҳил разведкаси ва ҳаво ҳужумидан мудофаа ҳарбий объектлари, денгиз объектлари, шунингдек, ракета ва учувчисиз учиш аппаратлари омборларига муваффақиятли зарба бериб, Эроннинг ҳарбий салоҳиятини заифлаштиришда давом этди. 17 июл куни Иорданияда америкалик ҳарбийларга ҳужум қилган Ислом инқилоби қўриқчилари корпуси кучларига ҳам зарба берилди».
Эрондаги Mehr агентлиги хабарига кўра, АҚШ мамлакат жанубидаги Сирик шаҳри атрофига зарба берган, қурбонлар ёки инфратузилма объектларида шикастланишлар қайд этилмаган. Tasnim агентлиги маълум қилишича, Америка ҳарбийлари Ироқ билан чегара яқинидаги Шодигон шаҳри яқинидаги объект бўйлаб ҳам зарба берган.
Mehr хабарига кўра, Эрон атом энергияси ташкилоти АҚШнинг Дархованда қурилаётган атом электр станциясига йўллаган зарбасини қоралаган, хабарда бу ҳужум айнан қачон рўй берганига аниқлик киритилмаган.
Сўнгги зарбаларга жавобан Эрон ҳарбийлари яна Американинг Кувайтдаги ҳарбий объектлари ва техникаларига – Ал-Адири лагери ҳамда Али Ал-Салом авиабазасига зарба берди, деб хабар қилган Эрон давлат телевидениеси якшанба куни армия баёнотига таяниб.
Шанба куни Ислом инқилоби муҳофизлари корпуси Али Ал-Салом базасидаги радиолокацион станция йўқ қилингани, шунингдек, Кувайтдаги америкалик ҳарбийларни қўллаб-қувватлаш марказига ҳужум қилинганини маълум қилганди. Кувайт нефт корпорацияси ўз объектларидан бирига «Эроннинг кетма-кет зарбалари»дан кейин жиддий шикаст етгани ҳақида хабар қилган.
Баҳрайн ҳаво ҳужумидан мудофаа кучлари ҳам якшанба куни Эрон ҳужумини қайтарди, деб хабар беради давлат телевидениеси. Қурбонлар ёки вайронгарчиликлар ҳақида хабарлар келиб тушмаган. Эрон Кувайт ва Баҳрайн бўйлаб янги зарбалар ҳақида маълумот бермаган.
АҚШнинг Иорданиядаги элчихонаси якшанба куни Қизил денгиз соҳилида жойлашган Акабе шаҳри халқаро аэропорти ва порти таҳдид туфайли эвакуация қилинганини маълум қилди, аммо Иордания ҳукуматига кўра, эвакуация ҳақида буйруқ берилмаган ва сўнгги соатларда эҳтимолий хафв қайд этилмаган.
17 июл куни Иорданияда Эрон баллистик ракеталари ва дронлари ҳужумини қайтариш чоғида икки нафар америкалик ҳарбий ҳалок бўлганди. Centcom расмий баёнотига кўра, яна бир ҳарбий хизматчи бедарак йўқолган, тўрт нафари яраланган.
Бу хабардан кейин Эрон билан уруш давомида ҳалок бўлган америкалик ҳарбий хизматчилар сони 16 нафарга етди, яна 420 нафардан ортиқ ҳарбий яраланган, дея қайд этади Reuters. АҚШ мудофаа вазири Пит Ҳегсет X ижтимоий тармоғида шундай деди: «Уларнинг қурбонлиги бизнинг қатъиятимизни мустаҳкамлайди».
АҚШнинг Эрондаги кўприклар, электр станциялари ҳамда бошқа инфратузилма объектларига қилаётган ҳужумларига жавобан Эрон шанба куни Саудия Арабистонидаги нишонларга, шунингдек, АҚШнинг Форс кўрфазидаги бошқа иттифоқчилари ҳам ҳужум қилган.
Шу куни Эрон олий раҳбари Мужтаба Хоминаийнинг навбатдаги баёноти эълон қилинди. Унда Қўшма Штатларга ишониб бўлмаслиги, Трамп томонидан имзоланган англашув меморандуми «ҳеч нарсага арзимаслиги» қайд этилган. Хоминаий АҚШ учун «янада оғирроқ оқибатлар» билан таҳдид қилган. Унинг ўзи уруш бошланганидан буён жамоатчиликка кўриниш бермаяпти ва Эрон ҳукумати унинг номидан баёнот чиқариб келмоқда.
Шанба куни Эрондаги нашрлар Баҳрайндаги АҚШ ҳарбий самолётлари жойлашган шайх Исо авиабазасига, шунингдек, разведка маълумотларини қайта ишлаш марказига зарба берилгани ҳақида хабар берди.
Эрон давлат телевидениеси баёнотига кўра, шанба куни эрта тонгда Иорданиядаги Америка базасига ракета ва дронлар орқали ҳужум пайтида Американинг камида иккита қирувчи самолёти ва яна учта самолёт йўқ қилинган.
Саудия Арабистонида шанба куни эрта тонгда Ал-Харжа ва Янбу шаҳарларида ракета ҳужуми туфайли аҳолидан хавфсиз жойларга яшириниш сўралган. Бу сўнгги уч ойдан кўпроқ вақт ичида Саудия Арабистони ҳудудига қилинган илк ҳужум бўлди. Лекин маҳаллий расмийлар бу зарба юзасидан расмий изоҳ бермаяпти, Эрондагилар ҳам ўз ҳисоботида бу ҳужумга тўхталмаган.
АҚШ Марказий қўмондонлиги шу ҳафта бошида Эрон кузатув пунктлари, ҳарбий логистика инфратузилмаси, ер ости қурол-яроғ омборлари ва денгиз объектларига зарбалар берилганини маълум қилганди.
Эрон давлат телевидениеси хабар беришича, шанба куни эрта тонгда АҚШнинг ҳаво зарбалари оқибатида Ҳўрмуз бўғози яқинида жойлашган Ҳўрмузгон вилоятида уч киши ҳалок бўлиб, саккиз киши яраланган, шунингдек, иккита кўприк ва йўл туннелига зарар етган.
Эрон соғлиқни сақлаш вазирлиги шанба куни берган баёнотга кўра, сўнгги уч ҳафта ичида АҚШ зарбалари оқибатида 50 киши ҳалок бўлиб, 500 дан ортиқ киши жароҳатланган.
Теҳрон Қўшма Штатларни Ҳўрмуз бўғози устидан назорат ўрнатишга интилишда айбламоқда.
АҚШ бўғозда эркин кемачиликни таъминлаши ва Эронга қарши санкцияларни юмшатиши керак бўлган ўзаро англашув меморандуми имзоланганидан бир ой ўтиб, денгиз блокадасини қайта тиклади. Теҳрон аввалроқ Вашингтонни меморандумнинг бир неча бандларини, жумладан, бўғоз орқали кемалар ҳаракати учун жавобгарликни Эронга юкловчи бандларни бузишда айблаб, Ҳўрмуз бўғози яна ёпилишини эълон қилганди.
Шанба куни Саудия Арабистони давлат телевидениеси томонидан эълон қилинган қўшма баёнотга кўра, Европа Иттифоқи ва Форс кўрфази давлатлари Теҳронни ҳеч қандай шартларсиз ёки йиғимларсиз бўғоз орқали кемаларнинг тўсиқларсиз ҳаракатланишини таъминлаш учун денгиз қатновига барча ҳужумлар ва аралашувларни дарҳол ва сўзсиз тўхтатишга чақирди.
Ислом инқилоби муҳофизлари корпуси якшанба куни тўрт кема Эроннинг огоҳлантиришларини эътиборсиз қолдириб, АҚШ кўмагида «хавфли маршрут» орқали бўғозидан ўтишга урингани, кейинроқ иккита кема ортига қайтгани, қолган иккитаси томон дронлар учиб боргани ҳақида маълум қилди. Тафсилотлар келтирилмаган.
