Йўл ҳаракати қоидаларининг 2та бандига ўзгартириш киритилади

Киритилаётган қоидага кўра, юк автомобиллари фақат чапга бурилиш ёки қайрилиб олиш учун четки чап бўлакка ўтиши мумкин, бошқа ҳолларда юк машиналарига йўлнинг четки чап бўлагида ҳаракатланиш тақиқланади.

Фото: Kun.uz

Вазирлар Маҳкамасининг 2015 йил 24 декабрдаги 370-сон қарори билан тасдиқланган Йўл ҳаракати қоидаларига ўзгартириш ва қўшимчалар киритилмоқда. Бу ҳақда ИИВ ЙҲХББ бошлиғи Олим Саидов юк ташиш фаолияти билан шуғулланувчи тадбиркорлар билан ўтказилган йиғилишда маълум қилди.

Қайд этилишича, киритилаётган ўзгартириш ва қўшимчалар жамоатчилик муҳокамасидан ўтган.

“Йўл ҳаракати қоидаларининг 67-моддасида (амалдаги): “1 йўналишдаги 3 ва ундан ортиқ бўлакли ҳар қандай йўлда четки чап бўлакли ҳаракат серқатновлиги сабабли бошқа бўлаклар банд бўлган ҳолларда, шунингдек, қувиб ўтиш, чапга бурилиш ёки қайрилиб олиш, рухсат этилган тўла вазни 3,5 тоннадан ортиқ бўлган юк автомобилларига эса фақат чапга бурилиш ёки қайрилиб олиш учун эгаллашга рухсат этилади”, — дейилган.

Янги таҳрирдаги қоидаларда мазкур бандга 2-қисм киритиляпти. Унга кўра: “Шунингдек, юк автомобилларига фақат чапга бурилиш ёки қайрилиб олиш учун четки чап бўлакни эгаллашга рухсат этилади. Бошқа ҳолларда юк автомобилларига йўлнинг четки чап бўлагига ҳаракатланиш тақиқланади”, — деди полковник.

Шу билан бирга, йўл ҳаракати қоидаларининг 121-банди тўлдирилади. Бу бандга “юк автомобиллари йўлнинг четки чап бўлагида ҳаракатланади. Бошқа ҳеч қандай алтернатив йўқ. Фақатгина чапга бурилиш ёки қайрилиб олиш учун рухсат этилади”, — деган қўшимча киритиляпти.

Айтилишича, мазкур модданинг эски таҳририда 3,5 тоннадан ошиқ юк автомобиллари дейилгани кўп савол ва тортишувларга сабаб бўлмоқда. Мазкур ўзгартириш эътирозларга барҳам беради.