«Бугундан республикадаги барча ОТМларда таълим сифати бўйича ўрганишлар бошланади» — ОТВ

«Ўрганиш бўйича ишчи гуруҳга эса Олий ва ўрта махсус таълим вазири Абдуқодир Тошқулов ва Таълим сифатини назорат қилиш давлат инспекцияси бошлиғи Улуғбек Тошкенбоев раҳбарлик қилмоқда.

Олий таълим муассасаларидаги танқидий, таҳлилий ўрганишлар 23 та мезон асосида ташкил қилинади. Бунда асосий эътибор олий таълимдаги ислоҳотлар, илм, фан ва ишлаб чиқаришдаги интеграциялар, ахборот ресурс марказлари фаолияти, молиявий, академик мустақиллик берилган таълим муассасаларига амалий кўмак бериш, илмий салоҳият, таълим жараёнининг қай даражада ташкил этилгани, масофавий таълим, кредит-модуль тизими, талабалар турар жойларида яратилган шарт-шароитлар, тизимдаги мавжуд муаммолар ва уларни жойида бартараф этиш, коррупцияга қарши курашиш ва шаффофлик жорий қилингани каби мезонларга қаратилади», – дейилади хабарда.

Таъкидланишича, ўрганишлар якуни билан ОТМларда таълим сифатини ошириш, илмий ва инновацион фаолиятни самарали ташкил этиш ҳамда рақобатбардошлигини ошириш ва таълим жараёнини сифат жиҳатидан янги босқичга кўтариш каби мақсадлар кўзланган.