Таълим ва илм-фан вазирлигида давлат олий таълим муассасалари ректорлари иштирокида йиғилиш ўтказилди.
Вазирлик 6 ноябр куни тарқатган хабарга кўра, йиғилишда таълим сифати ва битирувчилар бандлиги, мурожаатлар ва ижро интизоми, талабаларнинг яшаш шароитлари, энергия тежамкорлиги, халқаро ҳамкорлик ҳамда кадрлар билан ишлаш масалалари кўриб чиқилган.
Маълум қилинишича:
давлат олийгоҳларининг 2026 йилги битирувчиларидан 13,8 минг нафари банд эмас;
таҳлил қилинган 29,7 мингта ўқув адабиётининг 5,5 мингтаси чоп этилганига 20 йилдан ошган, айрим фанлар бўйича эса адабиётлар мавжуд эмас;
ётоқхоналар қурилишида кечикишлар кузатилмоқда, ижара хонадонларидаги шароитларни ўрганишда камчиликлар бор.
“Бир қатор олий таълим муассасаларидаги мансабдор шахсларнинг лавозимига лойиқлигини ўрганиш ва натижаси бўйича хулоса киритиш учун ишчи гуруҳ тузиш белгиланди.
Масъулларга камчиликларни белгиланган муддатларда бартараф этиш вазифаси юклатилди”, – дейилади расмий хабарда.
Ректорларга 15 кун ичида талабалар ва ўқитувчилар учун қабуллар ташкил этиш, уларнинг муаммоларини жойида ҳал қилиш, ойлик, чораклик ва йиллик иш режаларини шакллантириш топширилган.
Аввалроқ Тошкентда талабалар “Хавфсиз талаба” иловасини ўрнатишга мажбурланаётгани хабар қилинганди.
