Чилонзор тумани болалар ва ўсмирлар спорт мактабида имконияти чекланган бир гуруҳ спортчилар камондан ўқ отишнинг “compound bow” тури билан шуғулланмоқда. Камондан ўқ отишнинг бу тури Ўзбекистонда ҳозирча янги, ўзбек тилига таржима ҳам қилинмаган, лекин сўзма-сўз “аралаш ипли камондан ўқ отиш” дейиш мумкин.
Паралимпия қўмитасининг камондан ўқ отиш бўйича терма жамоа аъзоси, мураббий Убайдулла Имомқулов мазкур спорт тури, унинг Ўзбекистонга кириб келиши тарихи ва спортдаги режалари ҳақида гапириб берди.
Камондан ўқ отишнинг “compound bow” тури ҳақида
Камондан ўқ отиш спортининг айнан биз машғулот олиб бораётган “compound bow” тури Ўзбекистонга 2018 йилда кириб келди. Унгача камондан ўқ отишнинг классик тури мавжуд бўлиб, соғлом спортчилар орасида оммалашганди. “Compound bow” турини Ўзбекистонга олиб киришда ташаббус кўрсатдим. Ҳозирда уни имконияти чекланган спортчилар орасида оммалаштириш учун ҳаракат қиляпман. Соғлом спортчилар орасида ҳам кенг тарқалиши учун ҳаракат қилишни режалаштирганман.
Камондан ўқ отиш спорти инсоннинг нафақат жисмоний, балки ақлий ривожланишига ҳам ёрдам беради.
Камондан ўқ отишнинг классик ва “compound bow” турлари орасида фарқлар бор. Классик тур Олимпия ўйинларига киритилган, бироқ “compound bow” Олимпия ўйинлари рўйхатида йўқ, у Паралимпия ўйинлари спорт турлари рўйхатига киритилган.
Бундан ташқари, камоннинг ипида ҳам фарқлар бор.
“Бахтсиз тасодиф билан ўнг қўлимдан айрилганман”
2005 йилда бахтсиз тасодиф билан ўнг қўлимдан айрилганимдан сўнг маълум вақт ўтиб соғлом муҳитни шакллантиришим учун нима қилишим мумкин деб ўйлай бошладим. Кейин ампутантлар футбол жамоасига бориб машғулотларда қатнашдим, бироқ чап қўлимни ҳам синдириб олгач, шифокор суякларим мўрт экани, футбол менга тўғри келмаслигини тушунтирди.
Шундан сўнг 2009 йилдан 2014 йилгача югуриш спорти билан доимий шуғулланиб, мунтазам равишда Ўзбекистон чемпиони бўлиб келдим, халқаро мусобақаларда қатнашдим. Лекин турли жароҳатлар олиб бу спорт турини ҳам ташлашга мажбур бўлдим.
