Хитой–Қирғизистон–Ўзбекистон темирйўли қурилиши қачондан бошланиши маълум қилинди 

Маълумотга кўра, қарор нафақат темирйўл транспорти ва инфратузилмасини келажакда ривожлантириш ва яхшилаш учун шароит яратади, балки темирйўл орқали йўловчи ва юк ташиш даражаси ва сифатини оширишга хизмат қилади.

– Темирйўл тармоғини ривожлантириш Вазирлар маҳкамасининг устувор йўналишларидан биридир. Кузда мустақиллигимиз тарихидаги энг йирик лойиҳа – Хитой–Қирғизистон–Ўзбекистон йўналиши бўйича темирйўл қурилишини бошлаш режалаштирилган. Бу лойиҳани қўллаб-қувватлаш зарур, – деди Қирғизистон вазирлар маҳкамаси раҳбари Оқилбек Жапаров йиғилишда.

Маълумот учун, 2019 йилда Хитой-Қирғизистон-Ўзбекистон темирйўлини қуриш бўйича техник-иқтисодий асос тайёрланганди. 

Россия техник-иқтисодий асосни тайёрлаш учун 200 миллион рубль (3 136 364 доллар) ажратган.

Хитой-Қирғизистон-Ўзбекистон темирйўлини қуриш ташаббуси 2000-йилларнинг бошларида эълон қилинганди, аммо ўша вақтдан бери бу нарса амалга оширилмади. 

2002 йилда Пекин келажакдаги тармоқнинг техник-иқтисодий асосини ишлаб чиқди ва унинг йўналишини аниқлади. Ўша ғояга кўра, йўл Торугарт довони орқали Арпадан ўтиб, Ўзган тумани орқали Қорасув шаҳрига етиб бориши ҳамда у ердан Ўзбекистонга олиб бориши лозим эди. Унинг умумий узунлиги 268 километрни ташкил қилиши керак бўлган.

2017 йилда Хитой-Қирғизистон-Ўзбекистон йўлини қуриш бўйича уч томонлама ишчи гуруҳ тузилган, уни амалга оширишнинг уч хил варианти ҳақида хабар берилганди.