Rossiya «Xitoy-Qirg‘iziston-O‘zbekiston» temir yo‘li uchun 3 mln dollar ajratdi

«Xitoy-Qirg‘iziston-O‘zbekiston» temir yo‘lini qurish bo‘yicha texnik-iqtisodiy asos (TIA) tayyorlandi. Bu haqda Qirg‘iziston prezidenti Sooronbay Jeenbekov ma'lum qildi.

Uning so‘zlariga ko‘ra, Rossiya texnik-iqtisodiy asosni tayyorlash uchun 200 million rubl (RF Markaziy banki kursi bo‘yicha 3 136 364 dollar) ajratdi.

«Siyosiy qaror qabul qilindi. Ekspert guruhlari ishlamoqda. Xitoy tomoni rozi bo‘ldi. Men Xitoyga ikki marta tashrif buyurdim, safarlar davomida bu borada muzokaralar olib borildi. Rossiya prezidenti bilan ham muzokaralar o‘tkazildi, siyosiy qaror qabul qilindi», - dedi prezident.

«Xitoy-Qirg‘iziston-O‘zbekiston» temir yo‘lini qurish tashabbusi 2000-yillarning boshlarida e'lon qilingandi, ammo o‘sha vaqtdan beri bu narsa amalga oshirilmadi. 2002 yilda Pekin kelajakdagi tarmoqning texnik-iqtisodiy asosini ishlab chiqdi va uning yo‘nalishini aniqladi. O‘sha g‘oyaga ko‘ra, yo‘l Torugart dovoni orqali Arpadan o‘tib, O‘zgan tumani orqali Qorasuv shahriga yetib borishi hamda u yerdan O‘zbekistonga olib borishi lozim edi. Uning umumiy uzunligi 268 kilometrni tashkil qilishi kerak bo‘lgan.

Qirg‘iziston sobiq prezidenti Almazbek Atamboyev hokimiyat tepasiga kelganidan so‘ng, «Xitoy-Qirg‘iziston-O‘zbekiston» yo‘nalishining o‘rniga «Tojikiston-Qirg‘iziston-Qozog‘iston-Rossiya» yo‘li qurishni taklif qildi. Ammo, bu g‘oya hech kim tomonidan qo‘llab-quvvatlanmadi. Shundan so‘ng, Qirg‘iziston rasmiylari yana «Xitoy-Qirg‘iziston-O‘zbekiston» yo‘li loyihasiga qaytdi va yangi yo‘nalishni taklif qildi.

2017 yilda «Xitoy-Qirg‘iziston-O‘zbekiston» yo‘lini qurish bo‘yicha uch tomonlama ishchi guruh tuzildi, uni amalga oshirishning uch xil varianti haqida xabar berildi.