Франция парламентига сайловлар биринчи турида етакчи аниқланмади 

Францияда бўлиб ўтган парламент сайловларининг биринчи босқичида президент Эммануэл Макроннинг «Биргаликда» коалицияси 25,8 фоиз овоз билан етакчилик қилмоқда. Бу ҳақда 13 июнь, душанбага ўтар кечаси мамлакат Ички ишлар вазирлиги эълон қилган натижаларда айтилади.

Сўл популист Жан-Люк Меланшон бошчилигидаги «Янги халқ экологик ва ижтимоий иттифоқи» 25,7 фоиз билан иккинчи ўринда бормоқда. Марин Ле Пен бошчилигидаги ўнг «Миллий бирлашув» партияси 18,7 фоиз овоз тўплади. Ҳозирча парламентдаги энг йирик мухолиф куч - «Республикачилар» партияси биринчи турда бор-йўғи 10,4 фоиз овоз олди. 

Сайловчиларнинг жараёнда иштироки атиги 47,5 фоизни ташкил этди, бу 2017 йилдаги охирги сайловлардаги натижадан ҳам паст, ўшанда сайловчиларнинг 48,7 фоизи овоз берган. Бу рекорд даражадаги паст кўрсаткич, деб таъкидлайди AFP агентлиги. 

Франциядаги парламент сайловлари тизимининг ўзига хос хусусиятларини ҳисобга олган ҳолда, иккинчи тур натижаларига кўра кучлар нисбати сезиларли даражада ўзгариши мумкин. Биринчи турда парламентга кириш учун номзодни ўз сайлов округидаги сайловчиларнинг 50 фоиздан кўпроғи қўллаб-қувватлаши керак. Номзодларнинг ҳеч бири бундай натижага эриша олмаган сайлов округларида 12,5 фоиздан ортиқ овоз олган барча номзодлар иккинчи турга ўтади. Социологик хизматларнинг тахмин қилишича, биринчи турдан сўнг курашдан чиқиб кетган номзодларнинг сайловчилари иккинчи турда Макрон коалицияси вакилларини қўллаб-қувватлайди. 

Прогнозларга кўра, иккинчи турдан сўнг Макрон коалицияси 577 та депутатлик мандатидан 255 тадан 311 тагача ўринни, Меланшон вакиллари эса 170 тадан 210 тагача ўринни эгаллаши мумкин. Шу тариқа Макрон тарафдорлари Миллий йиғилишда 289 та ўринлик мутлақ кўпчилик позицияни ҳалигача ўзига кафолатлагани йўқ. Франция Миллий йиғилишига сайловнинг иккинчи босқичи 19 июнга белгиланган.