Шаҳрисабздаги тўйхонада содир бўлган жанжал пичоқбозлик билан тугади

Ижтимоий тармоқларда Шаҳрисабз шаҳридаги тўйхонада бир киши бир неча киши томонидан пичоқлангани айтилган хабарлар тарқалди. Вилоят ИИБ ахборот хизмати хабар юзасидан муносабат билдирди.

Унда ёзилишича, 2022 йил 12 июнь куни соат 21:30 ларда Шаҳрисабз шаҳрида жойлашган тўйхона олдида шаҳарнинг “Янги ҳаёт” МФЙда яшовчи С.Ж. ҳамшаҳри “Ғалаба” МФЙда яшовчи Н.Қ. ва Шаҳрисабз тумани “Лолистон” МФЙда яшовчи Қ.А. билан жанжаллашиб қолган.

Жанжал давомида Н.Қ. фуқаро С.Ж.нинг ўнг билак соҳаси ва ўнг оёқ болдир соҳасига пичоқ билан тан жароҳати етказган. Натижада С.Ж. тан жароҳати олиб, Шаҳрисабз шаҳар тиббиёт бирлашмаси шифохонасига ётқизилган.

Қайд этилишича, мазкур ҳолат юзасидан Шаҳрисабз шаҳар ИИБ ҳузуридаги Тергов бўлинмаси томонидан терговга қадар текширув ҳаракатлари олиб борилмоқда.

Аввалроқ, Қашқадарёда қарз туфайли келиб чиққан жанжал одам ўлими билан якун топганди.