«Толибон» делегацияси Тошкентдаги халқаро конференцияда иштирок этади

Бу ҳақда 11 июль куни Ўзбекистон ташқи ишлар вазири в.б. Владимир Норов томонидан маълум қилинди. 

«Биз бугун бу мамлакатда ҳақиқий куч бўлган «Толибон» ҳаракатидан делегация келишини кутмоқдамиз», деди Норов бир кун аввал Москвада ўтказилган давра суҳбатида. 

Унинг таъкидлашича, толибларнинг конференцияда иштирок этиши «биз уларни тан олишимизни англатмайди». 

«Биз ушбу конференция орқали амалдаги ҳокимиятни хабардор қилмоқчимиз... Бу уларнинг Тошкент йиғилиши доирасида қабул қилган халқаро мажбуриятлари ва у ерда имзоланган келишувларни бажаришини таъминлашга қаратилган», — деди Норов. 

Ташқи сиёсат идораси раҳбари Россия, Ўзбекистон ва қўшни давлатларнинг позициялари бир-бирига тўғри келишини айтди: «Толибон» ҳаракати ўз мажбуриятларини бажариши, бу мамлакатдаги барча сиёсий, этник ва диний гуруҳларни ўз ичига олган инклюзив ҳукумат яратиши керак. 

25-26 июль кунлари Тошкентда Афғонистон бўйича халқаро конференция бўлиб ўтади, унда 20 дан ортиқ давлат делегацияси иштирок этади.