Кристина Киршнерни Буэнос-Айресдаги уйи ёнида отиб ўлдирмоқчи бўлишди, аммо тўппонча ишламай қолди. Ҳужум қилган шахс қўлга олинган. Вице-президент жабрланмаган. Киршнерни коррупция иши бўйича 12 йилга озодликдан маҳрум этишни талаб қилишяпти.
Аргентина вице-президенти Кристина Киршнерга суиқасд уюштирилди, деб хабар берди маҳаллий ОАВ 1 сентябр, пайшанба куни кечқурун. Суиқасд 69 ёшли сиёсатчининг Буэнос-Айресдаги уйи олдида содир этилган. Амалдаги давлат раҳбари Алберто Фернандес телевидение орқали қилган чиқишида айтишича, оломон орасидан бир киши Киршнерга тўппонча ўқталиб, тепкини босган, бироқ ўқ узилмаган. Тўппончанинг ишламай қолиши сабаби «техник жиҳатдан ҳали тасдиқланмаган», дея қўшимча қилди Фернандес.
Ҳужум қилган шахс қўлга олинди. Ички ишлар вазири Анибал Фернандеснинг сўзларига кўра, гап 35 ёшли бразилиялик эркак ҳақида кетмоқда. У нима сабабдан бу ишни қилгани номаълумлигича қоляпти. Вице-президент жабрланмаган. Al Jazeera телеканали воқеа акс этган видеони эълон қилди.
Фернандес мамлакатда жамоат тинчлиги бузилгани сабабли 2 сентябрни дам олиш куни деб эълон қилди. Аҳолига демократияни ҳимоя қилиш учун «тинчлик ва ҳамжиҳатликда» чиқишлар қилиш ҳамда Киршнер билан бирдамлик билдириш имконияти берилиши керак, дея тушунтирди у.
Сўнгги кунларда Киршнернинг юзлаб тарафдорлари сиёсатчини қўллаб-қувватлаш учун унинг уйи олдида лагер ташкил қилишди. Аёл коррупция бўйича судда айбланувчи саналади. Айблов томони вице-президентни 12 йилга озодликдан маҳрум қилишни ва умрбод давлат лавозимларида ишлаш тақиқланишини талаб қилмоқда. Тергов маълумотларига кўра, у жиноий гуруҳга раҳбарлик қилган ва давлатга бир миллиард евро миқдорида зарар етказган.
Кристина Киршнер 2019 йил декабридан бери вице-президент лавозимида ишлаб келмоқда. У 2007 йил декабридан 2015 йил декабригача Аргентина президенти бўлган.
