Даниядаги нефть ва газ конлари яқинида дронлар аниқланди

«Шимолий оқим» ва «Шимолий оқим-2» газ қувурларининг шикастланиши аниқланганидан кўп ўтмай, Дания полицияси 1 ва 2 октябрь кунлари Шимолий денгиздаги газ конлари яқинида рухсати бўлмаган дронлар парвози ҳақида хабар олди. Буни 4 октябр, сешанба куни Дания полицияси вакили журналистларга тасдиқлади.

Danish Offshoe Industry журнали маълумотларига кўра, Франциянинг TotalEnergies энергетика концерни томонидан ўзлаштирилаётган Roar газ кони яқинида номаълум дронлар аниқланган. У Дания қирғоғидан 200 километрдан ғарбда, энг йирик Дания газ кони - Тайра яқинида пайқалган.

29 сентябр куни Даниянинг Ekstra Bladet газетаси ва Bloomberg агентлиги TotalEnergies 28 сентябр куни ўзи ўзлаштираётган Ҳалфдан B нефть ва газ кони яқинида дронларнинг «рухсатсиз фаолияти» кузатилганини маълум қилди, у ҳам Шимолий денгизда, Дания қирғоғидан 210 километр узоқликда жойлашган. Ўшанда француз концерни ўзининг барча оффшор активлари ва қуруқлик объектларининг «хавфсизлик даражасини оширганини» билдирди.

AFP агентлиги журналистларига берган интервьюсида воқеаларни шарҳлар экан, TotalEnergies вакиллари 4 октябр куни Дания расмийларини «эҳтимолий кузатув» ҳақида хабардор қилиб бораётганини билдиришди. Компания «хавфсизлик тартиб-қоидалари учун зарур чораларни» кўрди ва Дания «полицияси, ҳарбийлари ва энергетика органлари» билан алоқада, дея қўшимча қилди концерн.

«Шимолий оқим» газ қувурининг иккала тармоғида сизиб чиқиш рўй берганидан сўнг, Европа иттифоқига Россиядан энергия ташувчилар етказиб бериш камайгани сабабли Дания ва Норвегия Европа энергетика бозорида муҳим ролга эга бўлди ҳамда ўз энергетика объектларида хавфсизлик чораларини кучайтирди.

Айни пайтда, «Шимолий оқим» газ қувури оператори Nord Stream AG илгари сўралган ва бундай фаолият учун зарур рухсатномалар йўқлиги сабабли қувурга етказилган зарарни текширишни ҳали бошлай олмаслигини айтди.

«Жумладан, Швеция расмийларининг баёнотига кўра, Болтиқ денгизи ҳудудида шикастланган жойлар атрофида давлат текширувини ўтказиш мақсадида кемалар ҳаракати, лангар ташлаш, сув остидаги ишлар, бошқариладиган сувости транспорт воситаларидан фойдаланиш, геофизик хариталаш ва бошқаларга тақиқ жорий этилди. Дания расмийларидан олинган маълумотларга кўра, Nord Stream AG сўровини кўриб чиқиш учун 20 иш кунидан кўпроқ вақт кетиши мумкин», — дейилади компания матбуот-релизида.

«Бундан ташқари, Nord Stream AG томонидан олинган ва тадқиқот учун зарур ускуналар билан жиҳозланган кема эгаси ҳозирда Норвегия Ташқи ишлар вазирлигидан иш жойига жўнаб кетишга рухсат йўқлигини маълум қилди», — дея қўшимча қилди газ қувури оператори.