Венгрия пойтахтида ўқитувчиларни қўллаб-қувватлаш ва бош вазир Виктор Орбан сиёсатини танқид қилишга қаратилган митинг бўлиб ўтди - бу сўнгги йилларда мамлакатда ўтказилган энг йирик акциялардан бири.
Будапештда ўн минглаб одамлар кўчаларга чиқиб, ўқитувчиларнинг маошларини Венгрия инфляциясига мос равишда оширишни талаб қилиб, ҳукумат ва бош вазир Виктор Орбанни танқид қилишди. Акция 1956 йилдаги Венгрия инқилоби муносабати билан бўлиб ўтди ва 20 фоизлик инфляция фонида кузда бошланган норозилик намойишларининг давомига айланди, деб ёзади 23 октябр, якшанба куни Reuters.
Намойишчилар ўқитувчиларни қўллаб-қувватловчи баннерлардан ташқари, «Орбан, йўқол» ва «Руслар, уйга қайтинглар» деган плакатларни ушлаб туришган. Ташкилотчилар акция иштирокчилари сонини 80 минг киши деб ҳисобламоқда.
Намойишчиларнинг Орбанга қарши асосий шикояти унинг таълим сиёсатидан норозилик бўлди – таълим муассасаларини етарлича маблағ билан таъминламаганлик ва ўқитувчиларнинг маоши пастлиги. Бироқ февраль ойида ҳукумат ўқитувчиларнинг иш ташлаш ҳуқуқини чекловчи қарор қабул қилди, буни эса намойишчилар норози ишчиларни қўрқитиш усули деб ҳисоблади. Апрель ойида Орбаннинг ФИДEС – Венгрия фуқаролик иттифоқи партияси мамлакат парламентига сайловларда ғалаба қозонишга муваффақ бўлди.
Октябрь ойи бошида Будапештда Венгрия ҳукуматининг ваъдаларидан норози бўлган ўқитувчиларни қўллаб-қувватлаш учун митинг бўлиб ўтди - унга кўра, маошнинг пастлиги Еврокомиссиядан нақд пул тушумларининг кечикиши билан боғлиқ. Сентябрь ойида Европа регулятори мамлакат ҳукуматини коррупцияга қарши етарли даражада курашмаганликда ва ҳуқуқий меъёрларни бузганликда айблади, шу сабабли Венгрияга ажратиладиган маблағни қисқартиришни таклиф қилди.
Намойишлар пайтида Орбан пойтахтдан 220 км узоқликда, Залаэгерсег шаҳрида бўлиб, у ерда Венгрия инқилоби шарафига нутқ сўзлади. Унда у Ғарб давлатларини 1956 йил воқеалари чоғидаги «хиёнат»да танқид қилган. «Агар Ғарб 1945 йилдан бери бизга иккинчи марта хиёнат қилмаганида, биз муваффақият қозонишимиз мумкин эди», - деди Орбан инқилоб воқеаларини баҳолаб.
Аввалроқ Кремль билан яхши муносабатда бўлган ва Россиянинг Украинага қарши уруши бошланишидан олдин Россия президенти Владимир Путин билан учрашган Венгрия бош вазири Россия ҳарбий босқини туфайли Москвага қарши жорий қилинган санкциялар учун Европа Иттифоқини бир неча бор танқид қилган эди. Июль ойи бошида у Европа Иттифоқи мамлакатлари вакиллари орасида ягона бўлиб, рус православ черкови патриархи Кириллга урушни оқлагани учун шахсий санкциялар қўлланишига қарши чиқди.
