Венгрия парламенти ҳукмрон “Тиса” партияси томонидан мамлакат президентлигига таклиф этилган Андраш Бакани ушбу лавозимга тасдиқлади. “Telex” хабарига кўра, 73 ёшли собиқ судьянинг номзодини 140 нафар депутат қўллаб-қувватлаган, олти киши эса қарши овоз берган. Виктор Орбаннинг “Фидес” партияси ва Христиан-демократик халқ партияси (KDNP) депутатлари президент сайловида иштирок этишдан бош тортди.
Бака – Инсон ҳуқуқлари бўйича Европа судининг собиқ судьяси (1991–2008 йиллар) ва Венгрия Олий судининг собиқ раиси (2009–2012 йиллар).
Венгрия бош вазири Петер Мадяр Бака номзодини илгари сурар экан, унинг ишдан бўшатилишини ноқонуний деб атади. Судья Виктор Орбан ҳукумати томонидан амалга оширилган конституциявий ва қонунчилик ислоҳотларини танқид қилган эди.
Венгриянинг аввалги президенти Тамаш Шуйок парламент 18 июль куни унинг ваколатларини муддатидан олдин тугатиш тўғрисидаги конституциявий тузатишни маъқуллаганидан сўнг ўз лавозимини тарк этди. Президентликка шахматчи Юдит Полгар номзоди ҳам кўриб чиқилган, бироқ у буни рад этган.
Ҳокимиятга келганидан бери “Тиса” партияси амалдаги президентни бир неча бор истеъфога чиқишга чақирган эди. Бу партия мамлакатни 16 йил бошқарган Виктор Орбаннинг “Фидес” партияси ўрнини эгаллади. Мамлакатнинг амалдаги бош вазири Петер Мадяр апрел ойидаги сайловдан аввалроқ Шуйокнинг истеъфосига эришишини айтган, сайловда ғалаба қозонганидан кейин эса уни бир неча бор “Виктор Орбаннинг қўғирчоқ президенти” деб атаган эди.
Венгрияда президент асосан тантанали ва вакиллик вазифаларини бажаради. Асосий ҳокимият бош вазир бошчилигидаги ҳукуматга тегишли. Бу лавозимни май ойидан бери Петер Мадяр эгаллаб келмоқда.
