“Экологик экспертиза тўғрисида”ги қонуннинг янги таҳрирдаги лойиҳаси эълон қилинди.
“Экологик экспертиза тўғрисида”ги янги таҳрирдаги қонун лойиҳаси 11 та боб, 64 та моддадан иборат. Қонун лойиҳасига илова сифатида давлат экологик экспертизасидан ўтказиладиган фаолият турлари рўйхати, экологик экспертиза ўтказиш муддатлари ва давлат экологик экспертизасини ўтказганлик учун ҳақ тўлаш тартиби ва тўлов миқдорлари белгиланмоқда.
Қонун лойиҳасида мазкур қонун мақсади, экологик экспертиза соҳасида қўлланиладиган асосий тушунчалар, давлат экологик экспертизаси соҳасида ваколатли давлат органлари ва улар ваколатлари, давлат экологик экспертизаси иштирокчилари ҳуқуқ ва мажбуриятлари, давлат ва жамоат экологик экспертизасини ўтказиш тартиби, экологик нормативлар лойиҳасини ишлаб чиқиш ва келишиш тартиби, давлат экологик экспертизаси хулосасини тузиш тартиби, давлат экологик экспертизаси хулосасини қайта расмийлаштириш ва амал қилишини тўхтатиш тартиби, стратегик экологик баҳолашдан ўтказиш тартиби ҳамда жамоатчилик эшитуви ва жамоатчилик экологик экспертизасига оид нормалар киритилган.
Қонун иловаларида давлат экологик экспертизасидан ўтказиладиган фаолият турлари рўйхати, давлат экологик экспертизасини ўтказганлик учун ундириладиган ҳақ миқдорлари ҳамда давлат экологик экспертизаси хулосаси, давлат экологик экспертизаси натижалари бўйича эксперт хулосаси намунавий шаклига оид масалалар батафсил ёритилган.
