Тошкент шаҳрида қурилиш компанияси 51 туп дарахтни кесиб ташлаган. Бу ҳақда Экоқўмита хабар берди.
Маълум қилинишича, қўмита ходимлари томонидан Яшнобод тумани Жарқўрғон кўчасида кўп қаватли турар жой мажмуасини қураётган “Б.Д.” МЧЖ фаолияти ўрганилган. Жараёнда қурилиш майдонининг кириш-чиқиш йўлларида юк машиналари ғилдиракларини ювиш учун блок-постлар қурилмагани, оқибатда лой ва тупроқ Жарқўрғон кўчаси бўйлаб 2–2,5 км масофагача ёйилиб кетгани аниқланган.
“Эски бинолар бузилишидан ҳосил бўлган 126 188,9 тонна чиқинди ва котлован қазишдан чиққан 368 432 тонна тупроқ қаерга олиб кетилгани ҳақида корхона ҳеч қандай ҳужжат тақдим эта олмаган. Ҳудудда 12 036 тонна қаттиқ маиший ва қурилиш чиқиндиси белгиланмаган жойда тўплаб қўйилган. Чиқиндиларни олиб чиқиш ва оқова сувларни ташиш бўйича шартномалар ҳам тузилмаган”, дейилади хабарда.
Шунингдек, МЧЖ 50 туп арча ва 1 туп чинорни кесиш учун ариза берган. Бироқ Тошкент шаҳар экология бош бошқармаси бунга рухсат бермаган. Шунга қарамай, қурилиш компанияси дарахтларни кесиб ташлаган.
МЧЖга нисбатан атроф-муҳитни ифлослантирганлик ва чиқиндиларни ноқонуний жойлаштирганлик учун 5 млрд 183,3 млн сўм компенсация тўлови ҳисобланган. Йўқ қилинган дарахтлар учун ўсимлик дунёсига етказилган 396 млн сўм зарарни қоплаш белгиланган.
Бундан ташқари, қурилиш фирмасига кесиб ташланган ҳар бир дарахт ўрнига 100 тупдан жами 5100 туп камида 3 йиллик кўчат экиш ва уларни 3 йил давомида парвариш қилиш мажбурияти юклатилган. МЧЖ раҳбарига 4,4 млн сўм маъмурий жарима қўлланилган.
