«Finance TCI» МЧЖ «Капиталбанк»нинг назорат пакетини қўлга киритди. Бу ҳақда банк томонидан Ягона корпоратив ахборот порталида маълумот қолдирилган.
«Finance TCI» 2022 йилнинг 28 декабрида банк устав капиталининг 50 фоизини ташкил қилувчи 214,4 млн дона оддий акциясини сотиб олган. Битим 786,89 млрд сўмга имзоланган ва бир дона акциянинг нархи 3670 сўмдан ҳисобланган.
Bankers.uzʼнинг эътибор қаратишича, ушбу миқдордаги акциялар Россиянинг «Telecominvest» ширкатига тегишли. Битим натижасида рус ширкати банк акциядорлари сафидан чиққан бўлиши мумкин. Ҳозирда «Finance TCI» банкнинг 61,54 фоиз акцияларини назорат қилмоқда.
«Finance TCI» ҳақида
«Finance TCI» МЧЖ 2019 йилда ташкил этилган, устав фонди 172,8 млрд сўм. Унга Djuzum CPV эгалик қилади. Раҳбари – Афзалов Тимур Равилевич.
Компания айни вақтда «Djuzum CPV» LTD, «Узум», «Uzum Market», «Uzum Technologies», шунингдек, «One Factor» ва «Fast Delivery Technologies» компанияларига ҳам эгалик қилади.
Бунгача «Finance TCI» Алишер Усмоновга қарашли «Telecominvest» МЧЖнинг шуъба корхонаси ҳисобланиши ҳақида ёзган эдик. Шунингдек, маълумотларга кўра, Усмоновнинг «USM» ҳолдинги икки топ-менежерлари Лупичёва Ирина Владимировна ва Добродеев Борис Олеговичлар 14.03.2022 йил ҳолатига кўра «Finance TCI» МЧЖнинг тенг шерикли акциядорлари ҳисобланади.
Агар «Finance TCI» «Telecominvest»га қарашли акцияларни сотиб олган бўлса, бу Усмоновнинг «Капиталбанк»даги улушини бир қўлдан иккинчи қўлига ўтказганини англатади.
2023 йил 2 январь ҳолатига кўра, банкнинг таъсисчилари рўйхати қуйидагича бўлган:
- «Telecominvest» МЧЖ – 50,00 фоиз;
- «Continent Insurance» МЧЖ – 13,40 фоиз;
