Бутун дунё бўйлаб харидорлар «11.11» ва «Баракали жума» акцияларини Янги йил совғаларини олдиндан харид қилиш ёки қимматбаҳо буюмни ниҳоят катта чегирма билан сотиб олиш учун кутиб туради. Сотувчилар учун эса бу талаб чўққига чиқадиган давр бўлиб, хато қилиш айниқса қимматга тушади. Маҳсулот захираси, пухта ўйланган иқтисодиёт, самарали реклама ва тезкор етказиб бериш бўлмаганда, ҳатто катта чегирмалар ҳам натижани кафолатламаслиги мумкин.
Нима учун юқори мавсумга тайёргарликни олдиндан бошлаш кераклиги ва харидорлар талабининг ўсишидан бизнес манфаатлари йўлида қандай фойдаланиш мумкинлиги ҳақида сўзлаб берамиз.
«11.11» акцияси қандай пайдо бўлган?
«11.11» чегирмалари ёки Бутунжаҳон харидлар куни тарихи даромад олиш истагидан эмас, балки Хитойда 11 ноябрь куни нишонланадиган ёлғиз инсонлар байрамидан бошланган.
2009 йилда Alibaba компанияси Бўйдоқлар кунини монетизация қилишга қарор қилди ва 11 ноябрь куни 27 нафар сотувчи иштирок этган «Бренд маҳсулотларига 50% чегирма» акциясини бошлади. Тажриба муваффақиятли бўлди: вақт ўтиши билан Хитойдаги маҳаллий байрам жаҳон электрон тижоратидаги энг йирик савдо даврларидан бирига айланди.
Ноябрдаги чегирмалар глобал трендга айланди
Ноябрь ойи чегирмаларига қизиқиш тобора ортиб бормоқда. 2025 йилда Cyber Week даврида жаҳон онлайн савдолари 336,6 млрд долларга етди — бу ўтган йилга нисбатан 7 фоиз кўпроқ. Кибер-душанбадаги савдолар ҳам ўсиб, 53 млрд долларни ташкил этди (+7 фоиз йилдан йилга) [4].
Шу билан бирга, ушбу даврдаги онлайн буюртмаларнинг 70 фоизини харидорлар мобил қурилмалар орқали расмийлаштирган. Бундан ташқари, чегирмалар даври тобора узайиб бормоқда, харидлар учун эса рақамли каналлар янада муҳим аҳамият касб этмоқда. Ушбу глобал йўналиш маҳаллий бозорда ҳам ўз аксини топмоқда:
Ўзбекистон миллий статистика қўмитаси маълумотларига кўра, 2025 йил давомида мамлакатда e-commerce бозори икки баравар ўсди: 15,21 трлн сўмдан 33,55 трлн сўмгача
Ҳисоб-китоблар учун мобил молиявий хизматлардан фойдаланаётган харидорлар сони тобора ортиб бормоқда. Масалан, 2025 йилда мобил банк иловалари орқали амалга оширилган операциялар ҳажми йил давомида 1,6 баравар ўсиб, 646 трлн сўмни ташкил этди
