Гидрометеоролог Эркин Абдуҳалатовнинг ёзишича, ҳозирда Скандинавия яримороли шарқидаги совуқ антициклон маркази келаётган икки уч кунликда Россия ғарбида ҳароратнинг сезиларли даражада пасайишига олиб келади. Масалан, пойтахт Москвада 6-7 январь тунлари ҳарорат минимумлари -25 даража совуқ бўлиши прогноз қилинган.
Совуқ антициклон ҳаракати аввалига жануб, сўнгра шарққа томон йўналади ва 9-10 январда Россия марказини эгаллайди. Бунда аста-секин Ўзбекистоннинг шимолий ҳудудлари ҳам антициклон чекка қисми таъсирига туша бошлайди.
9 январдан Ўзбекистоннинг шимолий вилоятларида Қорақалпоғистон Республикаси, Хоразм, шунингдек, Бухоро ва Навоий вилоятларида кечаси 8-13°совуқ, кундузи 3-8°совуқ бўлади.
Ўзгидромет прогнозларига кўра, 10-15 январда республика бўйлаб ҳаво ҳарорати кечалари 12-17 совуққача, кундуз кунлари 5-8 даража совуққача, шимолда кечалари 17-22 даража совуққача, Устюрт ва чўл ҳудудларининг баъзи жойларида кечаси 25-27, кундуз кунлари 7-10 даража совуққача бўлади.
Хизмат маълумотига кўра, 10-15 январь кунлари жанубий вилоятлар ва Фарғона водийсида кечалари 5-10 совуққача, кундуз кунлари 2-5 даража совуққача пасаяди.
