Тажрибали сиёсатчи, канцлер Олаф Шолцнинг партиядоши, 62 ёшли Борис Писториус Германиянинг янги мудофаа вазири этиб тайинланди. Ундан олдинги вазир, Кристина Ламбрехт бошқа кўплаб масалалар қатори Украинага ҳарбий техника етказиб бериш масаласидаги қатъиятсизлиги учун тез-тез танқид қилингач, истеъфога чиқди. Тахминларга кўра, эндиликда Писториус кўплаб иттифоқчиларнинг сўровини эшитган ҳолда Германиянинг Leopard 2 танкларини Киевга юбориш борасида аниқ қарор қабул қилиши керак.
Писториус 19 январ куни қасамёд қабул қилганидан сўнг расман ўз лавозимига киришади ва шу куни Пентагон раҳбари Ллойд Остин билан учрашув ўтказади.
2021 йил декабридан бери Германия мудофаа вазири лавозимида ишлаб келган Кристина Ламбрехт 16 январ куни истеъфога чиқди. У ўз қадамини Украинага ёрдам бериш бўйича Германияга қилинаётган босим остида тўғри қарор қабул қила олмаслиги билан изоҳлади.
Дарҳақиқат, Ламбрехт бир неча ойдан бери Украина масаласидаги қатъиятсиз позицияси ва қуролли кучлар бошқарувидаги умумий хатолари учун фаол танқид қилиб келинаётганди.
Хусусан, унинг 2022 йил январида, Россиянинг Украинага босқини бошланишидан сал олдин, Киевга беш мингта каска жўнатгани ва буни Берлиннинг Киевни қўллаб-қувватлашига «аниқ ишора» дея айтгани, кўпчиликда норозилик уйғотганди. Бу пайтда Украинанинг Ғарбдаги бошқа иттифоқчилари, жумладан, Буюк Британия ва АҚШ Киевга учувчи қуроллар, хусусан, танкка қарши ракета тизимларини юбораётган эди. Бундан ташқари, Лембрехт мудофаа вазири этиб тайинланганидан кейинги биринчи интервьюсида ҳарбий унвонлар тизимини билмаслигини тан олганди.
Бироқ, Ламбрехт учун сўнгги томчи унинг ижтимоий тармоқларда жойлаштирган янги йил видеоси бўлди. Ушбу видеода Лембрехт Берлиндаги мушакбозликлар фонида туриб, уруш у учун «кўплаб махсус таассуротлар» ва «жуда қизиқарли, ўзига хос одамлар билан кўпдан кўп учрашувлар» тақдим этганини айтади. Кўпчилик Украинадаги урушга нисбатан бундай ёндашувни мутлақ ноўрин деб ҳисоблади.
Матбуот, шунингдек, Ламбрехтнинг Германия қуролли кучларининг техник таъминотини яхшилай олмаганини ҳам эслади. Бу сўнгги йилларда мамлакатнинг ўзида ҳам, НАТО иттифоқчилари орасида ҳам жуда кўп танқидларга сабаб бўлмоқда.
Бундан ташқари, сўнгги кунларда Ламбрехтга нисбатан босим ҳам кучайди, чунки иттифоқчилар Германиянинг Leopard 2 танкларини Киевга етказиб бериш учун Берлиннинг розилигини кутмоқда. Европанинг бир қатор давлатлари, жумладан Полша ва Финландия Украинага ушбу танкларни беришга тайёрлигини билдирган, бироқ Берлин ҳозиргача бунга рухсат беришдан бош тортиб келмоқда. Канада ҳам «танк иттифоқи»га қўшилиши мумкинлигини истисно этмаяпти, бироқ немис ҳукуматининг рухсатисиз бундай қадамни кўриб чиқмоқчи эмас.
