DW’нинг ёзишича, dpa ва AFP агентликлари 2 ноябр куни Берлинда ўтказилган Христиан-демократик иттифоқ ҳудудий бўлинмалари раҳбарларининг ёпиқ йиғилиши иштирокчиларига таяниб, Мерцнинг режаси ҳақида хабар берган.
Канцлер ўзи раҳбарлик қилаётган партияга марказчи сиёсий кучлар вакили бўлган аёлни ягона номзод сифатида таклиф қилмоқчи.
«Бу айнан аёл бўлиши керак, деган қатъий қарорга келдим», — дея Мерцнинг йиғилишдаги сўзларини келтирган агентликлар.
Маълумотларга кўра, канцлер учрашувда аниқ бир шахснинг исмини айтмаган. У номзодни Христиан-демократик иттифоқ президиумининг 9 ноябрдаги йиғилишига қадар тақдим этиши кутилмоқда.
Социал-демократлар Мерцнинг қарорини маъқуллади
Ҳукмрон коалицияда Христиан-демократик иттифоқ ва Христиан-социал иттифоқ блокининг ҳамкори бўлган Германия социал-демократик партияси Мерцнинг қарорини ижобий қабул қилган.
Партиянинг Бундестагдаги фракцияси парламент ишлари бўйича масъули Дирк Визе Rheinische Post газетасига берган интервюсида канцлер таклифини қизиқиш билан кутаётганини айтган.
Визенинг таъкидлашича, у бир неча ойдан буён давлатнинг энг юқори лавозимини аёл эгаллаши тарафдори бўлиб келмоқда. У бундай қарорни қабул қилиш вақти аллақачон етганини билдирган.
«Фридрих Мерц ҳам энди бу заруратни тан олаётганидан хурсандман», — деган сиёсатчи.
Меркел ҳам аёл президент сайланиши тарафдори
Аввалроқ Германиянинг собиқ канцлери Ангела Меркел ҳам амалдаги президент Франк-Валтер Штайнмайернинг ўрнини аёл эгаллаши кераклигини айтган эди.
«Германия Федератив Республикасининг 77 йиллик тарихи бор, аммо ҳеч қачон аёл федераль президент бўлмаган», — деган Меркель.
Унинг фикрича, ҳар ким ўзига бунинг вақти келмадимикан, деган саволни бериши керак.
Эҳтимолий номзодлар орасида тўрт аёл сиёсатчининг номи тилга олинмоқда
Христиан-социал иттифоқ раҳбари Маркус Зёдер бир неча ойдан буён Илзе Айгнер номзодини қўллаб-қувватлаб келмоқда. Айгнер Бавария парламенти — ландтаг раиси лавозимида ишлайди.
