Британияда миллиардер Фридманга қарши тергов қисман тўхтатилди

FT маълумотларига кўра, Британия Жиноятчиликка қарши кураш агентлиги Фридманга нисбатан ёлғон гувоҳлик бериш ва Буюк Британия Ички ишлар вазирлигини алдаш мақсадида фитна уюштириш бўйича терговни тўхтатди.

Буюк Британия Жиноятчиликка қарши кураш миллий агентлиги (NGA) россиялик тадбиркор Михаил Фридманга нисбатан илгари қўйилган учта жиноий ишнинг иккитаси бўйича терговни тўхтатди. Бу ҳақда 4 апрел, сешанба куни The Financial Times манбаларига таяниб хабар берди. 

Нашр маълумотларига кўра, агентлик Фридманга нисбатан ёлғон гувоҳлик бериш ва Буюк Британия Ички ишлар вазирлигини алдаш мақсадида фитна уюштириш бўйича терговни тўхтатган. Шунга қарамай, идора ҳанузгача тадбиркорни пул ювиш билан боғлиқ жиноятларда гумон қилмоқда. 

NGA газетага ўтган йилнинг декабр ойида Лондонда қўлга олинган 58 ёшли россиялик бадавлат шахсга нисбатан икки томонлама терговни қисман якунлаганини тасдиқлади. Агентлик гап Фридман ҳақида кетаётганига аниқлик киритмаган. 

2022 йил 3 декабрда Жиноятчиликка қарши кураш миллий агентлиги пул ювиш ва ёлғон кўрсатма бериш учун тил бириктириш билан шуғулланган уч киши қўлга олинганини эълон қилди. Ҳибсга олинганлар орасида Михаил Фридман ҳам бор, аммо унинг исми ўша пайтда айтилмаган. Кейинроқ учала шахс ҳам 150 минг фунт стерлинг гаров эвазига қўйиб юборилган. 

Forbes маълумотларига кўра, бойлиги 12,6 миллиард доллар бўлган Михаил Фридман 2015 йилдан бери Буюк Британияда яшайди. Россиянинг Украинага бостириб кириши ортидан Европа Иттифоқи ва Буюк Британия унга қарши санкциялар киритди. Фридман уларга суд орқали эътироз билдирмоқчи.