Ўзбекистон қишлоқ хўжалиги маҳсулотлари экспорти географиясини кенгайтириш доирасида маҳаллий узум ва қовунларнинг янги навлари Буюк Британия бозорига етказиб берилди. Бу ҳақда «Дунё» ахборот агентлиги хабар берди.
Ўзбекистоннинг Лондондаги элчихонаси кўмагида Британиянинг Capital Foodservice компанияси ўзбек мева-сабзавот маҳсулотларини импорт қилишни йўлга қўйган.
Хусусан, Буюк Британияга Ўзбекистонда етиштирилган «Келин бармоқ» навли узум, шунингдек, «Торпеда», «Кўкча» ва «Оби новвот» навли қовунлар етказиб берилмоқда.
Экспорт қилинаётган маҳсулотларни Британияга тезкор етказиш учун ҳаво транспортидан фойдаланилмоқда. Қишлоқ хўжалиги маҳсулотлари Uzbekistan Airways авиакомпаниясининг мунтазам рейслари орқали манзилга олиб борилмоқда.
Мева-сабзавот маҳсулотларини Буюк Британияга етказиб бериш жараёни мавсум якунига қадар мунтазам давом эттирилиши режалаштирилган.
Қайд этилишича, ушбу ҳамкорлик Ўзбекистон қишлоқ хўжалиги маҳсулотларининг Британия бозоридаги иштирокини кенгайтириш, маҳаллий мева-сабзавотларга бўлган талабни ошириш ҳамда ўзбек маҳсулотларининг хориждаги нуфузини мустаҳкамлашга қаратилган.
Шу тариқа, Буюк Британияга экспорт қилинаётган ўзбек қишлоқ хўжалиги маҳсулотлари ассортименти «Келин бармоқ» узуми ва қовуннинг бир нечта маҳаллий навлари ҳисобига кенгаймоқда.
