АҚШ прокуратураси собиқ президент Доналд Трампга қарши иш бўйича айблов хулосасини эълон қилди. Сиёсатчига 37 та банд бўйича айблов қўйилган. Хусусан, у ёлғон кўрсатма бериш, жиноий тил бириктириш, махфий материалларни сақлаш ва яширишда гумон қилинмоқда.
Ушбу бандларнинг ҳар бири бўйича Трамп катта миқдорда жарима ва қамоқ жазосига ҳукм қилиниши мумкин. Шунга қарамай, у президентликка номзодини қўя олади.
Махфий материаллар
Тергов маълумотларига кўра, Трамп Флорида штати, Мар-а-Лаго шаҳридаги шахсий қароргоҳида 31 та махфий ҳужжатни сақлаган. Улар АҚШ ядровий қурол дастури тафсилотларини, АҚШ ва унинг иттифоқчиларининг эҳтимолий заиф томонларини ҳамда АҚШ ҳужумга учраган тақдирда жавоб ҳаракатлари режаларини акс эттирган.
«Ушбу махфий ҳужжатларни ошкор қилиш Қўшма Штатлар миллий хавфсизлигига, халқаро муносабатларга, Қўшма Штатлар ҳарбий манбалари ва агентларининг хавфсизлигига ҳамда разведка маълумотларини йиғишнинг нозик усулларидан фойдаланишда давом этишига таҳдид солиши мумкин», дейилади иш бўйича тайинланган махсус прокурор Жек Смит хулосасида.
Ортиқча гапириб қўйди
Айблов хулосасига кўра, Трамп тегишли ҳуқуққа эга бўлмаган бир неча кишига махфий ҳужжатларни кўрсатишни режалаштирган. Хусусан, 2021 йил 21 июль куни у ёзувчи, ношир ва қўл остидаги икки ходими билан бу ҳақда телефонда гаплашган. Суҳбат давомида собиқ президент уларга «АҚШ томонидан бир давлатга ҳужум қилиш бўйича махфий режа» ҳақида гапириб берган. Хулосада бу давлатнинг номи келтирилмаган, аммо эҳтимол гап Эрон ҳақида кетаётган бўлиши мумкин.
Иккинчи шундай ҳодиса 2021 йил август ёки сентябрь ойида содир бўлган. Шунда Трамп гўёки ўз ёрдамчисига маълум бир давлатнинг махфий харитасини кўрсатиб, у ердаги ҳарбий амалиёт унчалик яхши кетмаётганини айтган.
Ҳамкорлик қилмади
Трампга қарши иш эпизодларининг бир қисми терговга тўсқинлик қилиш, ёлғон кўрсатма бериш ва терговчиларни чалғитиш билан боғлиқ.
Прокуратуранинг даъво қилишича, сиёсатчи Оқ уйдан ҳужжатларни уйига олиб кетиш учун шахсан қутиларга солган. Кейин федерал ҳокимият уларни қайтариб олишга уринаётганда, қутиларнинг қаердалигини назорат қилиб турган.
Бундан ташқари, хулосада айтилишича, Трамп адвокатларининг хабарисиз қутиларни омбордан ўз қароргоҳига кўчирган. Айтилишича, Трамп ўз ёрдамчиларига сўроқ пайтида ёлғон гапиришни буюрган.
Махсус прокурор Жек Смит барча америкаликлар Доналд Трамп айнан нимада айбланаётганини билиши кераклигини таъкидлади. Унинг сўзларига кўра, гап АҚШ хавфсизлиги учун муҳим бўлган қонунларни бузиш ҳақида кетмоқда. Прокурор суд эълон қилмагунча Трампни айбдор деб топмаслик керак деган фикрни айтди, бироқ жараён тез якунланишига умид қилди.
