Германия: «Ғалла битими» бекор қилиниши - дунёдаги энг қашшоқ одамларга зарба

Германия ташқи ишлар вазири Анналена Бербок Россияни Украинадан ғалла экспорти бўйича келишувни узайтиришдан бош тортгани учун кескин танқид қилди. «Россиянинг келишувни бузгани ва ҳозир Одессани бомбардимон қилаётгани нафақат Украина учун янги зарба, балки дунёдаги энг қашшоқ одамларга ҳам зарбадир», деди у 20 июль, пайшанба куни Брюсселда Европа Иттифоқининг ташқи алоқалар бўйича кенгаши йиғилиши олдидан. 

Бербокнинг сўзларига кўра, миллионлаб одамлар Украинадан келадиган ғаллага боғлиқ, шунинг учун Германия барча халқаро ҳамкорлар билан бу дон элеваторларда чириб кетмаслиги учун ишламоқда. У Қора денгиз ғалла ташаббуси бошиданоқ «Украинага бирдамлик темирйўл коридорлари» билан мустаҳкамланганини тўғри деб атади ва энди тегишли саъй-ҳаракатлар янада кучлироқ бўлишини ваъда қилди. «Очарчилик ва ғалла қурол сифатида ишлатилмаслиги керак», деди Бербок. 

Украина ташқи ишлар вазири Дмитрий Кулеба ва АҚШ давлат котиби Энтони Блинкен 20 июль куни Брюсселда бўлиб ўтган Европа Иттифоқи ташқи ишлар вазирларининг йиғилишида иштирок этди. 

Урушдан олдин Россия ва Украина дунёдаги энг йирик ғалла экспортчиларидан бири эди. Шимолий ва Шарқий Африкадаги кўплаб мамлакатлар Россия ва Украина таъминотига боғлиқ. Украинада уруш бошланиши ортидан жаҳон бозорида озиқ-овқат нархи кескин ошди. БМТ маълумотларига кўра, ҳозир дунёда 735 миллионга яқин очликдан азият чекаётган одам бор, бу тўрт йил аввалгига нисбатан сезиларли ўсишдир. Бу, жумладан, Украина уруши билан боғлиқ.