24 август куни Table Briefings нашри Германиянинг «Иттифоқ-90/Яшиллар» партиясидаги манбаларига таяниб хабар беришича, Анналена Бербок БМТ Бош ассамблеяси раиси сифатидаги ваколати тугагач, Колумбия университетида ўқитувчилик фаолиятини бошлайди. Бербок ҳозир ҳам «Яшиллар» партияси аъзоси ҳисобланади.

ОАВ маълумотларига кўра, у Колумбия университетининг Халқаро ва жамоатчилик билан алоқалар мактаби — SIPAʼда ташкил этилган Master of Public Administration in Global Leadership («Глобал етакчилик соҳасида давлат бошқаруви магистри») дастурининг ҳамраҳбари бўлади.

DPA агентлиги қайд этишича, бу амалий фаолиятга йўналтирилган профессорлик лавозими бўлиб, классик илмий-тадқиқот кафедраси ҳисобланмайди.

Бербокнинг Колумбия университети билан ҳамкорлиги уч йил давом этиши режалаштирилган. Шунингдек, у таклиф этилган лектор сифатида дарслар ўтиши ва оммавий маърузалар билан чиқиш қилиши кутилмоқда.

Бербок Ню-Йоркда қолишни истаган

Анналена Бербок БМТ Бош ассамблеяси раиси лавозимига киришганидан кейин Германиядан Ню-Йоркка кўчиб ўтгани унга маъқул келганини айтган эди.

Унинг сўзларига кўра, Ню-Йоркда инсон шаҳарнинг хилма-хиллиги ичида «сингиб кетиши» мумкин. Бербок бу ҳолат баъзан унга катта енгиллик беришини ҳам таъкидлаган.

Бербок 2025 йил сентябридан бери БМТ Бош ассамблеяси раиси лавозимида ишлаб келмоқда. Бироқ ушбу лавозим доимий эмас — Бош ассамблея раиси бир йиллик муддатга сайланади.

Назарий жиҳатдан номзодлар қайта сайланиши мумкин бўлса-да, БМТдаги ички тартиблар, хусусан, номзодларни минтақавий ротация асосида кўрсатиш амалиёти бир шахснинг кетма-кет икки муддат лавозимда қолиши учун шароит яратмайди.

Сентябрь ойи бошида Бербокнинг ваколатлари Бангладеш вакили Халилур Раҳмонга ўтади. У ҳам Бербок сингари аввал ўз мамлакати ташқи ишлар вазири лавозимида ишлаган.

Бербок бу йўлни танлаган биринчи немис сиёсатчиси эмас

Анналена Бербок Германия ташқи ишлар вазири лавозимидан кейин АҚШда академик фаолият билан шуғулланадиган биринчи немис сиёсатчиси эмас.

Ундан аввал Германиянинг собиқ вице-канцлери ва ташқи ишлар вазири Йошка Фишер ҳам шундай йўлни танлаган. Фишер 1998–2005 йилларда Германия ташқи ишлар вазири бўлган ва Бербок сингари «Яшиллар» партияси вакили эди.