Украина Қора денгиздаги платформаларини қайтарди, Руминия чегарада бомбапанагоҳ қурмоқда. Уруш суратлари

Украинада урушнинг 566-куни ўтди. Асосий маълумотлар:

Володимир Зеленскийнинг офисидагилар Украина Константиновканинг 6 сентябр кунги ўққа тутилишини текширмаслигини маълум қилди: Киев учун «барчаси аён» — бу «Россия Федерациясининг навбатдаги ракета зарбаларидан бири эди».
Еврокомиссия санкциялар доирасида Россиядан шахсий буюмларни олиб кириш бўйича позициясини юмшатди. Идора энди шахсий мақсаддаги кийим ва косметика маҳсулотлари олиб ўтилишини чекламайди — ва божхона органларини автомобилларни текширишга жиддий эътибор қаратишга чақиради.
Литва, Латвия ва Эстония ўз чегараларидан Россия рақамлари ўрнатилган автомобилларни ўтказишни тўхтатди.
КХДР раҳбари Ким Чен Ин зирҳланган поездда Россияга келди. У Путин билан музокаралар ўтказмоқда. Учрашувдаги асосий мавзулардан бири, катта эҳтимол билан РФга қурол етказиб бериш масаласи бўлади.
Украинадаги «Антонов» самолётлари ишлаб чиқарувчиси дронлар тайёрлашни бошлади.
Руминия ҳудудида россияликлар дрони қолдиқлари топилганидан кейин мамлакат ҳукумати чегарадаги ҳудудлар аҳолиси фойдаланиши учун иккита бетон бомбапанагоҳ қуришни бошлади.
Украиналик учувчилар тез орада F-16 қирувчиларида учишни ўрганиш учун АҚШга етиб боради ва уларнинг тайёргарлик жараёни маҳорат даражасига қараб уч ойдан тўққиз ойгача давом этиши мумкин, деб хабар берди журналистларга АҚШ Миллий гвардияси Ҳарбий-ҳаво кучлари раҳбари Майкл Ло.
Украина «Бойко миноралари» — Қора денгиздаги газ ва нефт платформаларини қайтариб олди.

Запорижжя области аҳолиси эвакуацияси

Полициячи фронт чизиғидан бир неча километр масофада жойлашган Степногорск посёлкасидан эвакуация вақтида 10 ёшли Дмитрога ҳимоя нимчаси кийдирмоқда. Ушбу посёлкада электр, газ ва сув йўқ, у мунтазам равишда Россия томонидан ўққа тутилади

Руминия ва Украина чегарасида бомбапанагоҳ қурилиши

Украинанинг Измайил шаҳри яқинидаги Руминиянинг Плауру қишлоғидан икки ярим километр масофада жойлашган ҳудудда 9 сентябр куни дрон парчалари топилди — бу РФ армияси томонидан қўлланадиган дронларга мансуб парчалар бўлиб чиқди. Бу Руминияда бир ҳафта ичида иккинчи бор шундай ҳол кузатилиши бўлди: 4 сентябр куни ҳам мамлакат ҳудудига россияликлар дрони қолдиқлари тушганди. Россия томони вазият юзасидан изоҳ бермаган. Бухарестдагилар румин ҳарбийлари жанговар шайлик ҳолатида туришини маълум қилган, Руминия-Украина чегарасида эса бомбапанагоҳлар қуришга киришилган.