Франция 2027 йилгача электр энергияси ишлаб чиқаришда кўмирдан воз кечади

Франция президенти Эммануэл Макрон TF1 телеканалига берган интервюсида мамлакат электр энергияси ишлаб чиқаришда кўмирдан фойдаланишни тўхтатишини маълум қилди.

Фото: «Ouest-France»/Franck Dubray

Қайд этилишича, бу 2027 йилгача амалга ошади. Президентнинг сўзларига кўра, Франция электр энергияси ишлаб чиқаришда кўмирдан воз кечган Европадаги илк давлатга айланади.

Макроннинг таъкидлашича, Франция табиатга карбонат ангидрид гази чиқарилишини икки бараварга қисқартирган.

Le Parisien’нинг ёзишича, кўмирдан босқичма-босқич воз кечилади. Мамлакатдаги кўмирда фойдаланиладиган сўнгги электрстанциялар Cент-Аволд ва Кордеме шаҳарларида жойлашган. Улар биомасса ёрдамида ёниш усулига ўтказилиши маълум қилинди.

Маълумот учун, 2023 йил апрел ойида Евроиттифоқ кенгаши «Fit for 55 in 2030» иқлим дастури доирасида қатор қонунларни қабул қилди. Ундан 2030 йилгача иссиқхона газларининг табиатга чиқарилишини сезиларли камайтиришни назарда тутувчи қонун ҳам ўрин олган.

Европа Иттифоқи режани амалга ошириш, бундан ташқари, келажакда углерод нейтраллигига эришиш мақсадида иттифоқ ҳудудига импорт қилинадиган маҳсулотлар учун карбонат ангидридни табиатга чиқариш бўйича сертификатлар сотувини қисқартиради. Хусусий корхоналар учун эса бу борадаги бепул квоталар бекор қилинади.

#Франция #кўмир #энергетика

Kun.uz янгиликларини Google News'да кузатинг

+ Обуна бўлиш