Хавфли манёвр қилиб, бошқарувни йўқотган Spark'нинг рулида 18 ёшли ҳайдовчи бўлган. Жабрланувчилар турли жароҳатлар билан шифохонага ётқизилган. Улар Ҳиндистон фуқаролари экани айтилмоқда.
13 октябр соат тахминан 22:30 да Тошкентнинг Яккасарой тумани Бобур кўчасининг Шота Руставели кўчаси билан кесишмаси яқинида йўл-транспорт ҳодисаси рўй берди.
Gazeta.uz'нинг пойтахт ИИББ таяниб ёзишича, 2005 йилда туғилган Ш.Т. ўз бошқарувидаги Spark (давлат рақами 80 X 013 RA) автомобилида бошқарувни йўқотиб, пиёдалар ўтиш жойида уч нафар пиёдани уриб кетган.
Натижада пиёдалар – П.Х. (1983 й.т.), И.Р. (1983 й.т.) ва Х.А. (1978 й.т.) тан жароҳати билан шифохонага олиб кетилган.
Qalampir.uz хабарига кўра, жабрланганлар – Ҳиндистон фуқароларидир. П.Х. чап болдир суяги синиши; И.Р. бош мия ёпиқ жароҳати, бош мия чайқалиши; Х.А. эса бош мия ёпиқ жароҳати, бош мия чайқалиши ташхиси билан РШТЁИМга ётқизилган.
ИИББ терговга қадар текширув бошлаган.
Эслатиб ўтамиз, худди шу куни – 13 октябрда шаҳарнинг Юнусобод туманида Spark пиёдалар ўтиш жойида 70 ёшли аёлни уриб юборди. Кекса аёл тан жароҳатлари билан касалхонага ётқизилган.
