Еврокомиссия Венгрияга 900 млн евро ажратишни маъқуллади

Европа комиссияси Европа Иттифоқининг коронавирус пандемиясидан кейинги тикланиш Европа жамғармаси доирасидаги маблағларидан Венгрияга аванс сифатида 900 миллион евро ажратишни маъқуллади, деб хабар берди AFP 23 ноябр, пайшанба куни.

Брюссел Венгрияга ёрдам режасини 10,4 миллиард еврога оширишга рози бўлди, бу энди Россиянинг Украинага кириши натижасида юзага келган энергия инқирози туфайли қўшимча ёрдам чораларини ўз ичига олади. ЕИ расмийлари ажратилган 900 миллион евро миқдоридаги аванс ҳеч қандай шартлар билан боғлиқ эмаслигини ва инқироз оқибатларини зудлик билан юмшатиш учун мўлжалланганлигини таъкидлади.

Пул қазиб олинадиган ёқилғидан энергия алмашинувини қўллаб-қувватлаш учун мўлжалланган RePowerEU дастури доирасида ажратилиши режалаштирилган. Қарор энди Европа Иттифоқи мамлакатлари томонидан маъқулланиши керак, эҳтимол бу аъзо мамлакатлар молия вазирлари саммитида 8 декабр куни содир бўлади, деб ёзади Reuters.

Венгриянинг Украина бўйича позицияси

Европа расмийлари ажратилган маблағ Венгриянинг Украинага кейинги ёрдам бўйича қарорига ҳисса қўшишини кутмоқда, деб ёзади Reuters. Бош вазир Виктор Орбан ҳукумати Европа Иттифоқининг Украинага 50 миллиард евро иқтисодий ва 20 миллиард евро ҳарбий ёрдам кўрсатиш ва ЕИга қўшилиш бўйича музокараларни бошлаш ҳақидаги қарорини блоклаган, деб эслатади Reuters.

Аввалроқ Европа комиссияси коррупция ва Венгриядаги демократик меъёрларга риоя қилмаслик хавотири туфайли Будапештнинг блокнинг пандемиядан кейинги иқтисодий рағбатлантириш дастуридаги иштирокини музлатиб қўйган эди.