«Крокус»даги терактдан кейин ушланган чеченистонлик полицияда вафот этди

Москвада «Крокус Сити Холл» концерт залидаги терактдан сўнг қўлга олинган чеченистонлик Асхаб Успанов бир неча соатдан кейин полиция бўлимида вафот этди. Бу ҳақда «Агентство» нашри 1 апрел, душанба куни унинг онаси Таиса Успановага таяниб ёзди. Бундан уч кун аввал унинг ўлими ҳақида Чеченистоннинг мухолифатдаги 1ADAT Telegram-канали хабар берган эди. 

Таиса Успанованинг сўзларига кўра, унинг ўғли хотинининг ишига кетаётганида қўлга олинган. У бу қаерда содир бўлганига аниқлик киритмади. Ушланганидан сўнг Успанов хотинига қўнғироқ қилган: у унинг олдига келмоқчи бўлган, лекин келмасликни сўраган. Эркак полицияда «ўзига қарши ҳеч нарса йўқлигини» айтган, лекин кейинроқ қайтиб қўнғироқ қилиб, «хавфсизлик кучларига қўполлик қилганини» айтиб, уни полиция бўлимидан олиб кетишни сўраган. 

Успановнинг рафиқаси, онаси айтишича, икки соатдан кейин полицияга келган. У ерда унга «эри энди йўқлиги»ни айтишган. Успановнинг онаси ўғли Чеченистонда дафн этилганини даъво қилмоқда, бироқ жасад унга қандай ҳолатда ва қачон берилгани, унда қийноқ излари бор-йўқлиги ва ўлим сабаби нима эканлигини аниқлаштирмади. Унинг сўзларига кўра, Успанов терактга алоқадор бўлиши мумкин эмас. 

«Агентство» Успановнинг қурилиш соҳасида якка тартибдаги тадбиркор сифатида рўйхатдан ўтганини аниқлади. «СПАРК» тизимининг маълумотлар базасида унинг якка тартибдаги тадбиркор сифатидаги мақоми 22 март куни вафот этгани сабабли тугатилганлар рўйхатига киритилган, деб ёзади нашр. 

1ADAT: Успанов қийноққа солинган 

1ADAT Telegram-каналига кўра, Успанов ишдан кейин уйига қайтаётганида автобус бекатида ниқобли одамлар томонидан ҳужумга учраган ва у улар хавфсизлик кучлари эканини тушунмай, «қаршилик кўрсатган». Telegram-канал таъкидлашича, сўроқ пайтида хавфсизлик кучлари эркакнинг қовурғалари ва умуртқа поғонасини синдирган, шунингдек, бўғиш излари ва танада кенг тарқалган кўкаришлар бўлган.

1ADAT шунингдек, Успановнинг жасади ёриб кўрилгани тасвирланган видеони ҳам эълон қилди. Кадр ортидаги овознинг айтишича, хавфсизлик кучлари «жиноятини яшириш» учун ўз жонига қасд қилиш ҳолатини ўйлаб топган. Успановнинг онаси «Агентство»га ўғли мусулмон бўлгани учун ўз жонига қасд қила олмаслигини айтди. 

«Крокус Сити Холл»га ҳужум

Москва яқинидаги Красногорскда «Крокус Сити Холл» биносига ҳужум 22 март куни кечқурун содир бўлди. Қуролланган одамлар бинога бостириб кириб, автоматлардан ўт очган, бир неча портлашлар эшитилган ва ёнғин бошланган. Сўнгги маълумотларга кўра, теракт оқибатида 144 киши ҳалок бўлган, яна 551 киши жароҳатланган.

«Крокус Сити Холл»даги терактдан сўнг «ФСБ» ушбу ишда гумон қилинган 11 киши қўлга олинганини эълон қилди. Судлар аллақачон ўн кишини, шу жумладан тўрт нафар бевосита ижрочини ҳибсга олган. Улар суд мажлисларига қийноқлар белгилари билан олиб келинган - улардан бири тиббий аравачада келтирилган.

Ҳужум учун жавобгарликни ИШИД террор ташкилоти ўз зиммасига олди. Шу билан бирга, Россия раҳбарияти терактга Украинанинг алоқадорлиги тахмин қилинмоқда. Киев, шунингдек, ғарб давлатлари, жумладан АҚШ ва Германия бу айбловларни рад этади.