Хитойнинг BYD компанияси Абу-Дабидаги халқаро тақдимотда ўзининг янги Yangwang Altior люкс седанини таништирди. Autonews ушбу модел харидорларни нимаси билан жалб қилиши ва унинг негизида қандай технологиялар ётганини ўрганди.
Yangwang (BYD суббренди) савдо бўлими бош директори Ху Сяосин сўзларига кўра, седанни ишлаб чиқиш уч йил давом этган. Биргина автомобилнинг олд қисми юздан ортиқ дизайн вариантларидан ўтган. Altior қимматбаҳо тошлар билан безатилган 137 та элементдан иборат йирик радиатор панжарасига эга бўлди. Аммо айнан қандай тошлар ишлатилганига ойдинлик киритилмаган.
Altior’нинг узунлиги 5600 мм, кенглиги 2030 мм, баландлиги 1590 мм, ғилдирак базаси эса 3500 мм’ни ташкил этади. У Rolls-Royce Ghost’дан 201 мм узунроқ.
Кузовнинг икки хил рангда бўялгани, узайтирилган C-симон тиргак, жилоланган моноблокли ғилдирак дисклари ҳамда ён томонлари бўйлаб тортилган 4,8 метрли қўшалоқ безак чизиғи экстерьернинг бошқа ўзига хос жиҳатлари сирасига киради. Олд қисмдаги эмблема эса 24 каратли соф олтиндан тайёрланган.
Олд панелга кенг форматли панорамали дисплей ўрнатилган. Бироқ компания унинг диагоналини ҳозирча очиқламади. Орқа йўловчилар учун йиғиладиган иш юзасига эга марказий столча ҳамда электр юритувчи бўлма кўзда тутилган.
Altior’нинг олд эшиклари 80 даражага, орқа эшиклари эса 90 даражага очилади. Уларда соябон учун махсус ўрнатилган ғилоф-тутқич мавжуд. Иккинчи қатор йўловчилари учун шифтга 21,4 дюймли экран ҳамда ҳароратни мустақил бошқариш имконига эга, ҳар бири 5,5 литрли иккита музлаткич ўрнатилган.
Орқа ўриндиқлар тўлиқ горизонтал ҳолатгача ётқизилади. Улар уқалаш функцияси ҳамда оёқлар учун сурилувчи тиргаклар билан жиҳозланган. Шахсий дахлсизликни эса электр пардалар таъминлайди.
Салон безагида табиий чармдан фойдаланилган, пол гиламчалари эса қўй жунидан тўқилган. Марказий консолда 60 қиррали, олмос шаклида ишлов берилган айланма созлагичлар ўрнатилган. Овоз сифати учун 39 та динамикка эга Dynaudio Platinum Evidence аудио тизими жавоб беради.
