Олмалиқ шаҳрида фоторадар ўрнатилган Cobalt ЙТҲга учради

Пиёдага йўл бериш учун тўхтаган Cobalt’нинг орқа қисмига 24 ёшли ҳайдовчи бошқарувидаги Lacetti келиб урилган.

Тошкент вилояти Олмалиқ шаҳрида ички ишлар органи ходими бошқарувидаги Cobalt машинаси иштирокида ЙТҲ содир бўлди. Бу ҳақда вилоят ИИББ ЙҲХБ ахборот хизмати хабар берди.

Маълум қилинишича, ЙТҲ 3 июл куни соат 17:30ларда Олмалиқ шаҳри ҳудудидан ўтган автомобил йўлида юз берган. Россия фуқароси бўлган 24 ёшли Ш.И. Lacetti машинасини бошқариб бораётиб, оралиқ масофани сақламаган. Бунинг оқибатида ўзидан олдинда пиёдага йўл бериш учун тўхтаган 34 ёшли Й.Н. бошқарувидаги фоторадар ўрнатилган Cobalt машинасининг орқа қисмига урилган.

ЙТҲ оқибатида тан жароҳати олган фуқаролар йўқ, машиналар техник шикастланган. Қўшимча қилинишича, ҳозирда ҳолат юзасидан Олмалиқ шаҳар прокуратураси томонидан суриштирув ишлари олиб борилмоқда.