КХДРнинг чиқинди шари Жанубий Корея президенти идорасига учиб келди

24 июл, чоршанба куни Жанубий Кореянинг Yonhap ахборот агентлиги хабарига кўра, КХДРдан келган ҳаво шари Жанубий Корея президенти идораси биносига қўнди. Президент хавфсизлик хизмати ҳаво шари таркибини ўрганиб чиқди ва унинг кимёвий, биологик ва радиациявий хавф туғдирмаслигини маълум қилди. Департамент қўшимча қилишича, у Жанубий Корея Қуролли кучлари штаб бошлиқлари бирлашган қўмитаси билан биргаликда вазиятни кузатишда давом этмоқда. 

Жанубий Корея ҳарбийлари 21 июл куни Шимолий Корея чегарадан яна чиқинди шарларини учираётгани ҳақида огоҳлантирган эди. Олдинги ҳолатларда бўлгани каби, расмийлар аҳолини қулаган нарсаларга тегмасликка ва ҳуқуқ-тартибот идоралари ёки ҳарбийларга хабар беришга чақирди. 

Аввалроқ Сеул Шимолий Корея чегараси бўйлаб карнайлар орқали халқаро янгиликлар, демократия ва капитализм ҳақидаги маълумотлар ҳамда K-pop мусиқаларини эшиттиришни қайта бошлади. Жанубий Корея томони бу қадамни Пхеняннинг ҳаво шарлари ёрдамида амалга ошираётган «ёвуз, шармандали ва қўпол» ҳаракатларига муносабат сифатида изоҳлади.

Пхенян: чиқинди шарлари - Кимни танқид қилувчи варақаларга жавоб
 
Май ойидан бери Шимолий Корея жанубий чегара орқали икки мингга яқин ҳаво шарларини учирди, уларга чиқинди ва гўнг солинган қоплар илиб қўйилган. Шимолий Корея расмийлари аввалроқ уларнинг жанубий қўшнисига «самимий совға»лари «чегара ҳудудига ташвиқот материаллари ва чиқиндиларнинг тез-тез сочиб юборилишига жавоб» эканини таъкидлаган эди. Шу тариқа Шимолий Корея жанубий кореялик фаолларнинг Шимолий Корея раҳбариятини танқид қилувчи варақалар, яриморол жанубидаги демократик жамият ҳақида маълумот берувчи ва шимолда тақиқланган Жанубий Корея поп-гуруҳларининг мусиқий видеолари бўлган USB’лар бўлган шарларни учираётганига жавоб қайтарди.