Нидерландиянинг собиқ бош вазири Марк Рютте НАТО бош котиби лавозимига расман киришди. У бу лавозимда 2014 йилдан бери ишлаб келган Йенс Столтенбергни алмаштирди.
1 октябр куни бўлиб ўтган маросимда НАТО ҳарбий алянси раҳбари лавозимига киришган Марк Рютте Украинани қўллаб-қувватлашни устувор вазифа қилиб қўйишга ваъда берди, деб ёзди Euronews.
Рютте алянс Украинани қўллаб-қувватлашни кучайтириши ва уни НАТО аъзолигига янада яқинлаштириши кераклигини таъкидлаган бўлса, мудофаа шартномасига аъзо давлатлар раҳбарлари Киевнинг аъзолик йўлини ортга қайтариб бўлмаслигини айтишди.
Рюттенинг айтишича, иттифоқ энди ҳар қачонгидан ҳам катта, кучли ва бирлашган. Унинг сўзларига кўра, НАТО бош котиби сифатидаги устувор вазифалари, шунингдек, НАТО мудофаасини мустаҳкамлаш ва бошқа давлатлар билан ҳамкорликни мустаҳкамлаш бўлади.
Марк Рютте 2010 йил октябридан бери Нидерландия бош вазири лавозимида ишлаб келган, у Россияни танқид қилган ва Россия Федерацияси билан урушда Украинани доимий равишда қўллаб-қувватлаган.
