Гуржистон парламенти спикери Шалва Папуашвили Украинада барқарор тинчлик ўрнатиш зарурлигини таъкидлаб, «ўт очишни тўхтатиш узоқ муддатли тинчликни кафолатламаслигини» таъкидлади.
Папуашвили видеоконференция орқали Латвия пойтахти Ригада ўтказилган Қрим платформаси 3-парламент саммити иштирокчиларига мурожаат қилди.
«Икки ярим йилдан ортиқ вақтдан бери биз Европада фалокатли уруш гувоҳи бўлиб турибмиз, унинг такрорланиши ҳеч кимнинг хаёлига ҳам келмаган», — деди Гуржистон парламенти спикери.
Унинг таъкидлашича, Гуржистон ва гуржи халқи Украинани қўллаб-қувватлайди, чунки «уруш азоби ва тинчлик нархи нима эканлигини улардан яхшироқ ҳеч ким билмайди».
Папуашвилига кўра, халқаро тизим аввал Гуржистон, кейин Украинада адолатли ва барқарор тинчликни таъминлай олмади.
