КХДР чет эллик туристлар учун ўз чегараларини очди

Шимолий Корея чет эллик туристлар учун мамлакат шимоли-шарқида Расон махсус иқтисодий зонасини очди. Бу ҳақда Хитойнинг Young Pioneer Tours туроператори хабар берди.

Туроператор сайтида айтилишича, бугундан бошлаб эркин иқтисодий зона чет элликлар ташриф буюриши учун расман очилган. Турагентлик КХДРдаги шерикларининг сўзларига таянмоқда.

Туроператор маълумотига кўра, Расон шаҳри АҚШ ва Жанубий Корея фуқароларидан бошқа дунёнинг барча нуқталаридан бўлган туристларга чегараларини очади. «Хитойлик меҳмонлар зонага биринчи бўлиб ташриф буюриши кутилмоқда», — дейилади хабарда.

16 январ куни Хитой ва Испаниянинг учта туроператори хорижлик туристлар энди Шимолий Корея Россия ва Хитой чегарасидаги Расон эркин иқтисодий зонасига ташриф буюришлари мумкинлиги тўғрисида хабарнома олганини билдирган.

Агентлик таянган туроператорлардан бири Испанияда жойлашган, қолган иккитаси эса, жумладан, Young Pioneer Tours Хитойга тегишли.