АҚШда эркак заргарлик дўконидан 770 минг долларлик зиракларни ўғирлаб, ютиб юборди

АҚШнинг Флорида штати полицияси Tiffany & Co заргарлик дўконидан 769,5 минг долларлик зиракларни ўғирлаб, ютиб юборган шахсни қўлга олди, деб хабар бермоқда BBC.

Полиция маълумотларига кўра, 32 ёшли Жейтан Гилдер дўкон ходимларига ўзини “профессионал спортчи” учун ишлайдиган одам сифатида таништирган ва улардан “бир нечта қимматбаҳо буюмларни” кўрсатишларини сўраган. Кейин у зиракларни ўғирлаб, дўкондан қочиб кетган.

Гумонланувчи шу куннинг ўзидаёқ ушланди. Қўлга олиш пайтида полиция ходимлари эркак ўғирланган зиракларга ўхшаш бир нечта жисмларни ютиб юборганини кўрган.

Гилдер, шунингдек, олмос узукни ҳам ўғирламоқчи бўлгани айтилмоқда, аммо тахминларга кўра, у дўкондан қочиб кетаётганда узукни тушириб юборган.

Кейинроқ полиция гумонланувчининг қорин бўшлиғидан олинган рентген тасвирини эълон қилди, унда ҳақиқатан ҳам эркакнинг ошқозонида бегона жисм кўринади. Зирак чиқариб олингани ёки йўқлиги ҳақида маълумот берилмади.

АҚШ полицияси хабарига кўра, Гилдер 2022 йилда ҳам Техасдаги Tiffany & Co дўконини ўмарган. Колорадо штатида эса уни қамоққа олиш бўйича шу пайтгача 48 та ордер чиқарилган.

Гилдерга ниқоб тақиб босқинчилик қилиш ва жуда катта миқдорда ўғирлик содир этиш айблови қўйилган. Суд ҳукми чиқарилгунга қадар у айбсиз ҳисобланади.