Hugging Face ва унинг бўлинмаси Pollen Robotics бир кўзли ўрдак шаклидаги кичик, икки оёқли Microduck роботини тақдим этди. Олдиндан буюртмалар 2026 йил 27 августдан бошланади, нархи — солиқлар ва етказиб бериш харажатларисиз 399 доллар. Йил охиригача етказиладиган илк партиялар Шимолий Америка ва Европа учун мўлжалланган.
Бу шунчаки юмшоқ корпусдаги овозли ёрдамчи эмас. Microduck жисмоний сунъий интеллект (physical AI) учун ҳамёнбоп платформа сифатида яратилган: унинг ҳаракатлари симуляторда ўргатилиб, сўнгра роботнинг ўзига юкланади.
Ташқи кўриниши ва имкониятлари. Бўйи 25 см, эни 14 см, оғирлиги 800 граммдан кам. Қўллари йўқ: 15 та сервомотор оёқлар, бўйин, бош ва шарнирли қисқич-тумшуқни ҳаракатга келтиради. Намойиш видеосида ўрдак лапанглаб юради, ўтиради, тўп тепади, пайпоқ ёки маркерни кўтаради ва йиқилгандан сўнг ўрнидан туради.
Қутида еттита тайёр сценарий ва геймпад бор. Ғилдираклар, тўп, лазерли кўрсаткич ва NFC-нишонлар тахминан 39 долларлик алоҳида тўпламда сотилади. Ранглари: “Cream” (оч сариқ), “Graphite” (графит), “Lavender” (лаванда) ва “Sky” (мовий). Ҳар бир ўрдак илк бор ёқилганида уникал товушлар тўплами генерация қилинади ва бу овоз айнан шу роботга бириктирилади.
Ички қисми. Сунъий интеллект тезлаткичига эга Rockchip RK3566 процессори, 1 ГБ тезкор хотира, 32 ГБ доимий хотира, суратга олиш жараёнини кўрсатувчи индикаторли олд камера, ихчам LiDAR, иккита инерциал датчик, микрофонлар, динамик, бош ва тумшуқ қисмида NFC, Wi–Fi ҳамда Bluetooth модуллари мавжуд. Олинадиган NP-F550 аккумулятори тахминан бир соатлик автоном ишлашни таъминлайди.
Бозор ва хатарлар. Бунгача Hugging Face столусти Reachy Mini роботини сотган. Microduck уй хизматчиси эмас — унинг бўйи хонадон ишларига тўғри келмайди. Мақсадли аудитория: дастурчилар ва технология ишқибозлари.
Роботнинг тақдимоти Nvidia компанияси Hugging Face’ни тахминан 13 миллиард долларга сотиб олиши ҳақидаги миш-мишлар авж олган пайтга тўғри келди.
