Австралияда ўсмир ўқотар қурол билан самолёт бортига яширинча чиқди

Австралияда 17 ёшли ўсмир ов милтиғи ва ўқ-дорилар билан самолёт бортига яширинча чиқиб олди, деб хабар бермоқда The Guardian.

Воқеа 6 март куни Мелбурнда содир бўлган. Қуролланган ўсмир аэропорт ходимининг ёруғлик қайтарувчи кийимини кийиб олиб, тўсиқнинг туйнугидан учиш-қўниш йўлагига ўтган. Шундан сўнг у Сиднейга учиши керак бўлган самолётга чиқиб олган.

Самолётда 160 нафар йўловчи бор эди. Йигит қуролини яширишга уринмаган ҳам — одамлар унинг қуролланганини дарҳол пайқади. Уч киши ўсмирни ушлаб, полицияга хабар берди. Ҳуқуқ-тартибот ходимлари австралияликни ҳибсга олди. Ҳеч ким жароҳат олмади.

Аэропорт яқинида йигитнинг машинаси топилди. Илгари ўсмир ҳеч қандай жиноят бўйича жавобгарликка тортилмаган. Унинг террористик гуруҳлар билан алоқаси бор-йўқлиги ҳам номаълум. Ўсмирга нисбатан ҳали айблов эълон қилинмади.