Сирдарёда стадионда одамлар устига ҳайдалган Captiva аукционда сотилиб, пули давлат ҳисобига ўтказилди

Сирдарёда стадионда одамлар устига ҳайдалган Captiva давлат даромадига ўтказилди. Бу ҳақда Kun.uz’га МИБ ахборот хизмати хабар берди.

Маълум қилинишича, суд ҳукми билан машина давлат фойдасига мусодара қилинган. Бунинг ижроси эса МИБга юклатилган эди. Бюронинг Сайхунобод туман бўлими томонидан олиб борилган ижро ҳаракатлари давомида мазкур автомашина баҳоланган ва аукцион савдосига чиқарилган.

2025 йилнинг 3 март куни ўтказилган аукцион савдосида ушбу машина 100 млн 567 минг сўмга сотилган. Сотувдан тушган маблағ давлат даромадига ўтказилиши таъминланган.

2024 йилнинг 29 май куни Сайхунобод туманида маст эркак Captiva’ни стадионга бошқариб тушиб, атрофдагиларнинг ҳаётини хавф остига қўйган ҳолда машинани одамлар устига ҳайдаб борган эди. Ҳолат юзасидан Жиноят кодексининг 277-моддаси (безорилик) билан жиноят иши қўзғатилиб, ҳайдовчи тегишли тартибда қамоққа олинган ҳамда машина жарима майдончасига жойлаштирилганди.

Кейинчалик суд ҳукми билан ҳайдовчига 4 йил 6 ой озодликдан маҳрум қилиш жазоси тайинланган эди. Captiva машинаси эса жиноят қуроли деб топилган ва давлат фойдасига мусодара қилинганди.

“Иккинчи айланган вақтимда машинамнинг бурчаги бир болага тегиб кетди. Кейин шунча воқеа бўлди, таваккал дедим-да, стадион дарвозасига қараб ҳайдадим. Ўша орада машинани тошбўрон қилишди. Кейин тўғри чиқиб, уйимга кетдим. Ҳаммадан узр сўрайман, тавба қилдим. Энди умуман одам йиғилган жойга, тўйга ҳам бормайман, ваъда бераман. Охирги имконият беришингизни сўрайман”, деган эркак судда.

Судда даъвогарлар ундан шикояти йўқлигини билдирган. Бироқ эркакнинг машинаси олд қисми билан икки нафар шахсни туртиб юбориб, воқеа жойидан қочиб кетгани оғирлаштирувчи ҳолат сифатида баҳоланган.