АҚШда Киберқўмондонлик ва Миллий хавфсизлик агентлиги раҳбари лавозимдан олинди

АҚШ Қуролли кучлари Киберқўмондонлиги ва Миллий хавфсизлик агентлиги (МХА) раҳбари сифатида фаолият юритиб келган генерал Тимоти Хо лавозимдан олинди, деб хабар бермоқда The Washington Post.

Бундан ташқари, Хонинг Миллий хавфсизлик агентлигидаги ўринбосари Венди Нобл ҳам лавозимдан олинган.

Агентлик раҳбарининг ишдан бўшатилишини ўта ўнг активист Лора Лумер АҚШ президенти Доналд Трамп билан учрашувда сўраган эди. У Хо ва Миллий хавфсизлик кенгашининг яна бир неча ходимини Трампга содиқ эмасликда айблаган.

Лумернинг чақириқларидан кейин 3 апрел куни Миллий хавфсизлик кенгашининг камида беш нафар ходими ишдан бўшатилган. МХА раҳбарларининг нима сабабдан лавозимдан олинганига расман изоҳ берилмаган.

WP’нинг ёзишича, март ойида Хо Трампнинг маслаҳатчиси ва Ҳукумат самарадорлиги департаменти раҳбари Илон Маск билан МХАнинг Мэриленддаги штаб-квартирасида учрашган. Америкалик амалдорларнинг сўзларига кўра, учрашув «муваффақиятли» ўтган.

Генерал Тимоти Хо Миллий хавфсизлик агентлиги ва АҚШ Киберқўмондонлиги раҳбарлигига 2024 йил февралда тайинланган эди. У 30 йиллик ҳарбий хизмат тажрибасига эга «киберхавфсизлик соҳасидаги профессионал» дея таърифланади. Шунингдек, у 2018 йилги оралиқ сайловларни Россиянинг эҳтимолий аралашувидан ҳимояланиш мақсадида Киберқўмондонлик кучлари ҳаракатига раҳбарлик қилган.

2025 йил феврал охирларида АҚШ мудофаа вазири Пит Ҳегсет Киберқўмондонлик Россияга қарши ҳар қандай режалаштирилган ҳаракатларни тўхтатишни буюргани маълум бўлганди. Пентагон ушбу хабарни рад этган.