Овечкин НҲЛнинг мунтазам чемпионатларидаги голлар бўйича рекордни янгилади 

6 апрел, якшанба куни «Вашингтон Кэпиталз» жамоасининг россиялик форварди Александр Овечкин Миллий ҳоккей лигаси мунтазам чемпионатларида 895-шайбасини «Ню-Йорк Айлендерс»га қарши меҳмонда кечган баҳсда киритди ва бу кўрсаткич бўйича янги рекордчига айланди. НҲЛ афсонаси Уэйн Грецкига тегишли аввалги рекорд 26 йил сақланиб турганди.

Лигадаги 20 йиллик фаолияти давомида 39 ёшли Овечкин фақат бир марта Стэнли кубогини қўлга киритди ва шунинг учун НҲЛдаги умумий голлар сони бўйича Грецкидан анча орқада: 967:1016. У лиганинг плей-офф ўйинларида канадаликнинг 122 та шайбаси билан солиштирилганда атиги 72 та шайба киритган. Овечкин фаолиятининг асосий қисмида унинг "Вашингтон" жамоаси мунтазам равишда плей-офф босқичининг бошидаёқ Стэнли кубоги учун курашдан чиққан.

Стэнли кубогининг тўрт карра ғолиби, ҳозир 64 ёшда бўлган Уэйн Грецки 1979 йилдан 1999 йилгача НҲЛда ўйнаган. Фаолияти давомида у НҲЛда 2857 очко тўплаган, 894 гол урган ва 1963 та шайбага ассистентлик қилган. Унинг энг яқин таъқибчиси чехиялик Яромир Ягр 1921 очко тўплади. Ҳозирда фаолиятини давом эттираётган ҳоккейчилар орасида ушбу кўрсаткич бўйича биринчи ўнталикка 1682 очко билан "Питтсбург Пингвинз" жамоасидан 37 ёшли Сидни Кросби киради. Овечкин ҳозирда 11-ўринда бормоқда: "гол+пас" тизимига кўра, унинг ҳисобида 1618 очко бор.