Швеция кабеллар қасддан узилгани бўйича ҳеч қандай далил топмади

Швеция Хитойда рўйхатдан ўтган Yi Peng 3 кемаси 2024 йил 17-18 ноябр кунлари Болтиқ денгизида бири Финландия ва Германияни боғлаган, иккинчиси эса Швеция ҳудудидан Литвага олиб борадиган иккита кабелга лангар билан қасддан шикаст етказгани бўйича ҳеч қандай ишончли далил топа олмади. Бу ҳақда 15 апрел, сешанба куни Швеция Бахтсиз ҳодисаларни текшириш комиссияси (SHK) маълум қилди.

«Хитой кемаси Болтиқ денгизидаги маълумотлар узатиш кабелларига атайлаб шикаст етказганини аниқ айтиш мумкин эмас», — дейилади ҳукумат органи баёнотида.

Шу билан бирга, Швеция прокурори Ҳенрик Седерман Reuters агентлигига алоҳида тергов доирасидаги вазиятни ҳамон ўрганаётганини айтди. Терговчилар ҳам бир қатор қийинчиликларга дуч келишди, чунки Хитой ҳукумати кема устидан юрисдикцияни сақлаб қолади ва тергов фаолиятини ва бортда улар учун суҳбатлар ёзиб олишни тақиқлайди, дея аниқлик киритди SHK.

Хитой 2024 йил декабр ойида тергов учун маълумот ва ҳужжатлар тақдим этганини маълум қилди. Россия эса Болтиқ денгизидаги бундай воқеаларга алоқадорлигини рад этди.

Кабел ва телекоммуникация линияларида бир қатор узилишлар юз берганидан сўнг минтақа юқори даражадаги шай ҳолатга келтирилди. Reuters агентлигининг таъкидлашича, НАТО фрегатлари, самолётлари ва ҳарбий-денгиз кучларининг учувчисиз учоқлари билан ўз иштирокини кучайтирди.