Расмийларнинг аниқлик киритишича, қурбонлардан олти нафари аёл, уч нафари эркак бўлган, аммо ҳозиргача улардан қанчаси болалар, қанчаси катта ёшли кишилар экани маълум эмас.
Бунгача ҳалок бўлганлардан бири ўқитувчи экани хабар қилинганди.
Фожиадан кейин воқеа жойида ўз жонига қасд қилган ҳужумчининг исмини расмийлар ҳамон маълум қилмаяпти, аммо полиция бу 21 ёшли австриялик экани, Грац шаҳри чеккасида яшаб келганини хабар қилган.
Версиялардан бирига кўра, ҳужум шу билан боғлиқ бўлиши мумкин. Бироқ полиция департаменти вакиллари суриштирув ишлари эндигина бошлангани ва ҳозирча сабаблар бўйича бирор хулоса чиқариш имконсизлигини таъкидлаган.
Жиноят жойида иккита тўппонча топилган, бундан келиб чиқадики, ҳужумчи икки стволдан ўқ узган бўлиши мумкин.
Расмийлар қурол ҳужум қилган шахсга қонуний асосда тегишли бўлганини маълум қилди. Бу икки қуролдан ташқари, унда бошқа ўқотар қурол учун ҳам лицензия бўлган.
У илгари полиция ҳисобида турмаган.
Унинг жасади мактаб ҳожатхоналаридан биридан топилган.
Австрия ИИВ раҳбари, шунингдек, кундузги матбуот анжуманида 12 киши оғир жароҳат олганини маълум қилди. Аввалроқ Австрия нашрларида 30 киши жароҳатланган ҳолда шифохонага етказилгани ҳақида хабар тарқалганди.
Австрия канцлери Кристиан Стокер бутун мамлакат бўйлаб уч кунлик мотам эълон қилди, у чоршанба куни бир дақиқалик сукут билан бошланади.
Ҳужум ҳақида яна нималар маълум?
Ҳодиса маҳаллий вақт билан эрталабки соат 10 да содир бўлган. Хабар қилишларича, ҳужум қилган шахс иккита синфхонага қарата ўт очган, шундан кейин ўз жонига қасд қилган.
Ҳужум вақтида мактабда айнан нималар содир бўлгани ҳақида ҳозирча гувоҳларнинг кўрсатмалари йўқ.
Аммо Kronen Zeitung таблоиди мухбири мактабдаги ўқитувчи аёллардан бирининг турмуш ўртоғи билан гаплашишга муваффақ бўлган. У ўз рафиқаси ўқувчилари билан биргаликда синфхона ичида қамалиб олганини айтиб берган.
Қурбонларнинг исмлари ҳам келтирилмаяпти.
«Мен йўлнинг нариги томонидаги турар жой мажмуасида яшайман ва бу мактабга қатнайдиган бир неча болаларни танийман. Мен учун бу жуда катта шок. Умид қиламанки, ҳаммаси жойида», — дея 22 ёшли Марк Нолдендан иқтибос келтиради Австрия матбуоти.
