Meta Apple компаниясининг сунъий интеллект моделларини яратиш бўйича 100 кишилик жамоага раҳбарлик қилган Руоминг Пангни ишга ёллади. Bloombergʼнинг ёзишича, Meta бунинг учун 200 миллион доллардан ортиқ маблағ сарфлаган.
Агентликнинг келишув тафсилотлари билан таниш бўлган манбаларга кўра, Meta сунъий суперинтеллект устида ишлаётган жамоасининг янги аъзолари учун рекорд даражадаги шартларни таклиф қилган. Хусусан, Apple компаниясининг собиқ етакчи муҳандиси Руоминг Панг билан 200 миллион долларлик шартнома тузган.
Қайд этилишича, илгари Appleʼнинг сунъий интеллект моделларини ишлаб чиқиш бўлимини бошқарган Руоминг Панг Meta компаниясига кўп йиллик келишув доирасида қўшилган.
Унга таклиф қилинган компенсация шу қадар юқорики, Apple мутахассис учун рақобатлашмаган — бундай тўловлар компания раҳбарлари маошларидан ошиб кетади.
Шу билан бирга, Apple муҳандисининг шартнома шартлари компаниянинг янги жамоасидаги бошқа аъзолар даражасига мос келади.
Жамоага GitHub’нинг собиқ раҳбари Нэт Фридман ва тадбиркор Дениэл Гросс ҳам қўшилган. Бундан ташқари, Meta Scale AI стартапининг 49 фоизини 14,3 миллиард долларга сотиб олган ва унинг ҳаммуассиси Александр Вангни сунъий интеллект йўналиши бўйича директор этиб тайинлаган.
