Англиянинг «Манчестер Сити» клуби жаҳон чемпионати учун ФИФАдан тўлов олувчи клублар рейтингида кетма-кет учинчи марта етакчи бўлди, деб хабар берди The Athletic.
Жорий йилги жаҳон чемпионати учун Club Benefits Programme (CBP) дастурининг умумий мукофот жамғармаси 355 млн долларни ташкил этади. Бу Россия ва Қатарда ўтказилган мусобақалар жамғармасидан 70 фоизга кўпроқ.
Ушбу маблағнинг 250 млн доллари ўйинчилари финал босқичида, 100 млн доллари эса саралаш учрашувларида қатнашган клублар ўртасида тақсимланади. Қолган 5 млн доллар эса «клуб футболини ривожлантириш учун йўналтирилади».
Нашрнинг ҳисоб-китобларига кўра, «Манчестер Сити» турнирнинг якуний босқичигача етиб борган олти нафар аъзоси туфайли 4,4 млн долларга яқин пул ишлайди. Раян Шерки, Марк Гуири, Нико О’Райли, Жон Стоунс ва Жеймс Траффорд учинчи ўрин учун ўтказилган баҳсда қатнашган бўлса, Родри финалда Аргентинага қарши асосий таркибда майдонга тушган.
Иккинчи ўринни «Барселона» (3,9 млн доллар) эгаллади. Каталония клубидан мусобақанинг турли босқичларида 16 нафар ўйинчи иштирок этган. Шунингдек, «Бавария» (3,4 млн доллар), «Арсенал» (3,3 млн доллар) ва «Пари Сен-Жермен» (3,2 млн доллар) клублари топ-5таликка киритилди.
The Athletic рўйхатидан CBP дастури бўйича тўлов оладиган 451 та клуб ўрин олган.
