Арманистон собиқ бош вазири Женнифер Лопес концертига қилинган харажатларни конституцияга зид деб атади

Арманистон собиқ бош вазири Грант Багратян америкалик поп-юлдуз Женнифер Лопеснинг Еревандаги концерти учун мамлакат бюджетидан миллионлаб доллар ажратилганини конституцияга зид деб атади.

"Женнифер Лопеснинг Еревандаги чиқиши учун давлат бюджетидан 6 миллион доллар ажратилиши конституцияга зид. Давлат тадбиркорлик билан шуғулланмайди, бу жуда катта коррупцион хатарни ўз ичига олади. Бюджет пули бутун жамиятга тегишли, концертда эса чекланган сонли фуқаролар иштирок этди. Бу иш билан прокуратура, коррупцияга қарши органлар шуғулланиши керак" – деди Багратян.

Унинг таъкидлашича, мамлакат таълим, фан, маданият ва спорт вазири Жанна Андреасян қандай асосларга кўра Лопеснинг концертини ташкил этишга қарор қилгани юзасидан жавоб бериши, молия вазири Ваге Ованнисян эса давлат бюджетида кўзда тутилмаган харажатларга йўл қўйгани учун сўроқ қилиниши керак. 

Лопеснинг концерти якшанба куни республика стадионида бўлиб ўтди. ОАВнинг ёзишича, концертни ташкил этиш учун давлат бюджетидан 6 миллион доллар ажратилган. Кейинроқ Ереван вице-мэри Армен Памбукчян ҳукумат 7 миллион доллар ажратганини, бироқ харажатлар ўзини оқлаганини айтди.