29 октябр куни тонгида Арманистон парламентининг бир гуруҳ депутатлари мажлислар залида муштлашиб кетди.
Муштлашув ҳукмрон «Фуқаролик шартномаси» ҳамда мухолифатдаги «Кучли Арманистон» партиялари депутатлари ўртасида рўй берди. Зиддият депутат Тарон Чахояннинг чиқиши вақтида юзага келган даҳанаки жангдан бошланган.
Тўқнашув вақтида парламент вице-спикери Ваагн Алексанян мухолифатчилар томонга стул отган. News.am нашри ёзишича, депутатлардан бирининг бурни қонаган, бошқасининг кийими йиртилиб кетган.
Мажлис тўхтаб қолган, аммо парламент спикери Рубен Рубинян мажлис трансляциясини тўхтатмаган.
Депутатлар ўртасидаги тўқнашувлар парламент йўлагида ҳам давом этган.
Бу Арманистон парламентида депутатлар ўртасида содир бўлган биринчи оммавий муштлашув эмас. Октябр ойи бошида ҳам парламент биносида мухолифат ва ҳукмрон партия вакиллари ўртасида муштлашув бўлгани хабар қилинганди.
